21-январдиз Кьасумхуьруьн телевиденидин студияда Эдуард Ашурагъаеван цIийиз акъатнавай манийрин тестерин кIватIал раиж авунин мярекат кьиле фена.
Ктаб «Куьредин ярар» центрадин чапханада урус чIалал акъатнава. Ада къецепатан уьлквейрин, Урусатдин, Советрин девирдин ва Дагъустандин халкьарин макьамриз талукь тестерин паяр ава. Студияда ктабдин гьакъиндай веревирдер кьиле фейи вахтунда Алкьвадрин хуьруьн ва райондин музыкадин мектебрин кьилин дережадин муаллимар тир Рамазан Аликъулиевани Мусаиб Сейфулаева кIватIалдиз хъсан къимет гана. Чпин рахунра абуру, Э.Ашурагъаеван идалай вилик акъатай ктабрихъ галаз сад хьиз, тестерин кIватIалдини музыкадин тарсар тухунин карда мектебрин ва музыкадин училищейрин муаллимриз екез куьмек гудайди къейдна.
Мярекатдин эхирдай авторди вичин эхиримжи зегьметдикайни лагьана — Готфрид Алиевич Алиеван 120 йисаз бахшнавай ктабни раижна. Инал ада Дагъустанда пешекарвилин музыкадин бине эцигай касдиз санани памятник эциг тавунвайди рикIел гъана ва и гъалатI туькIуьр хъувуник умуд квайди лагьана.
Зи фикирдалди, Эдуард Ашурагъаева зурба кIвалах тухвана ва тухузва. Аферин!
Мизамудин Магьмудов
