Каспийскдин мулкунал алай инвестицийрин “Уйташ” майдандал “Экотар” ООО-дин гофрокартон ва гофрокъапар акъудуниз талукь проект кьилиз акъудна куьтягьнава. Карханади кIвалах башламишуниз талукь шад мярекат 14-августдиз кьиле фена. Ана вахтуналди РД-дин Кьилин везифаяр тамамарзавай Сергей Меликовани иштиракна.
Къейд ийин хьи, фабрика эцигунин кIвалахар 2019-йисуз гъиле кьунай ва 2021-йисан январдиз акьалтIарнай. Кархана лазим тир вири къурулушралди ва хам-малдалди таъмин я. Гележегда ина хсуси къапара туна гьазурнавай майвайрин консервияр акъудун пландик ква.
Проект кьилиз акъудун патал 220 миллион манат хсуси такьатар желбнава. ДатIана кIвалахдалди таъмин жедай рабочийрин кьадар 90-даз барабар хьун лазим я, абуру пуд сменада кIвалахда. Са касдин юкьван мажиб 35 агъзур манатдив агакьда.
Фикирзавайвал, тамам гужлувал аваз кIвалахиз башламишайла, карханади РД-дин вири жуьрейрин бюджетриз чара ийидай налогрин кьадар йиса тахминан 40 миллион манатдиз барабар жеда. Фабрикадихъ йиса 55,7 миллион квадратный метр картон ва 38,9 миллиондин кьадарда аваз гофрокъапар акъуддай мумкинвал ава. С.Меликова производстводин гьерекатар тешкилнавай жуьредиз виниз тир къимет гана. Ада къейд авурвал, фабрика эцигнавай чкадал чилин участок нетижалудаказ ишлемишнава.
“Фабрикада производстводин гьерекатар тешкилнавай жуьредилай разивал ийиз жеда, вучиз лагьайтIа, ам зирзибил амукь тийидай, яни тамам циклдин жуьреда туькIуьрнава. Ихьтин карханаяр чахъ тIимил ава. Экологиядин жигьетдай михьивал ина кьве сеферда артухди я: сад лагьайди, михьи суьрсет акъудзава, кьвед лагьайди, производстводин нетижада маса, герек авачир продуктар арадал къвезвач. Идалайни гъейри, кархана куьруь вахтунда ва са акьван гзафбур тушир такьатрихъ арадал гъанва. ГьакIни ада гьам производство виликди тухунин, гьамни рабочийриз зегьметдин кутугай шартIар арадал гъунин жигьетдай алай аямдин вири истемишунриз жаваб гузва. Заз Дагъустанда и проект уьмуьрдиз кечирмишай ксариз сагърай лугьуз кIанзава”, — лагьана ада.
“Экотар” ООО-дин генеральный директор Руслан Мурсалова малумарайвал, фабрикади акъуддай картондин продукция кIвачин къапарин, ширинлухрин ва ичкидин промышленностривай, Кеферпатан Кавказда машгьур тир майвачивилин ва багъманчивилин хилерин суьрсет къапара тун патал ишлемишиз жеда.
“Ихьтин продукциядихъ игьтияж ава. Амма икьван чIавалди ухшар тир зурба производство Адыгеяда авай. Гила чи фабрика Россиядин мулкунал виридалайни кьиблединди жеда. Акъудзавай шей чна Дагъустандин, СКФО-дин республикайрин суьрсет гьасилзавайбуруз маса гун кьетIнава. Ам агакьарунин гьакъиндай рахунар гьакIни Азербайжандихъ ва Туьркменистандихъ галаз кьиле тухузва”, — гъавурда туна Р.Мурсалова.
Санлай къачурла, къейд ийин, 2021-йисан 6 вацран нетижайралди, Дагъустанда промышленный производстводин кьадар 15 процентдин гзаф хьанва. РД-дин промышленностдинни алишверишдин министерстводи хабар гузвайвал, хъсан патахъ дегишвилер хьуник виле акьадай хьтин пай — 119,2% — промышленностдин гьялдай хилерин карханайри кутунва.
«Лезги газет»
