9-декабрдиз ДГТУ-да «Технолёт» тIвар алай чирвилер гудай ва тренировкаяр кьиле тухудай центр ачухна. И кардиз талукьарнавай мярекатда РД-дин Кьил Сергей Меликовани иштиракна.
Центрада пилот галачиз кардик кутазвай къурулушар идара ва ремонт ийидай пешекарар гьазурда. Республикадин Кьилин фикирдалди, пилот галачиз кардик кутазвай комплексар неинки са дяведин гьерекатра ишлемишзава, абурукай гьакI геосъемка, майишатдин объектрин диагностика ийидайла ва маса макьсадрани менфят къачузва.
Къейд ийин хьи, Дагъустанда ихьтин центр арадал гъунин теклиф РД-дин Халкьдин Собранидин Председатель Заур Аскендерова ганай. И кардай Сергей Меликова региондин парламентдин спикердиз сагърай лагьана.
Гуьгъуьнлай Дагъустандин Кьил центрадин кабинетриз килигна ва кIвалахдихъ галаз таниш хьана. Малум хьайивал, центрада дяведин тежриба авай пешекар инструкторри кIвалахзава. Абурун гъилик алай вахтунда са десте дагъустанвийри чирвилер къачузва. Инструкторрин гафаралди, пилот галачиз кардик кутазвай авиациядин къурулушар идара ийидай операторар кьве гьафтедин къене гьазурзава.
Чи мухбир
