23-июлдилай 2-августдалди Башкириядин Уфа шегьерда «Спорт. Чун саналди» лишандик кваз кьиле фейи сурдлимпийцийрин (япариз зайифдаказ ван къвезвай спортсменрин)  международный гатун акъажунра дуьньядин 30 уьлкведай тир 1500 далай виниз спортсменри спортдин 21  жуьредай (абур спортдин 16 объектдал кьиле фена) чпин устадвал къалурна. Россиядин хкянавай команда (вири санлай 400-далай виниз медалар къазанмишуналди) 1-чкадиз лайихлу хьана. Белоруссиядин ва Кениядин хкянавай командайри, талукь тирвал, 2 ва 3-чкаяр кьуна. Акъажунар  кьиле физвай вири йикъара абурун иштиракчийриз ва болельщикриз 50 махсус таржумачиди (сурдопереводчик) ва 200-далай виниз волонтёрри куьмекар гана. Акъажунра­ю Россия­дин ва Да­гъус­тандин хкянавай командайрик кваз иштиракай чи ватанэгьлийрини хъсан нетижаяр къазанмишна.

Кьилди къачуртIа, акъажунриз виридалайни чIехи командаяр Белоруссиядай (165 касдикай ибарат тир делегация), Къазахстандай ва Узбекис­тандай (гьар санай 70 – кас), Ирандай (69 кас), Иракдай (60 кас), Кения­дай (41 кас) рекье тунвай. Акъажунра Швейцариядай — 2, Латвиядай ва США-дай гьар санай тир са са спорт­сменди иштиракна. Америкадай тир атлет Бреди Перри Джейкоба къейд авурвал, ада спорт политикадихъ галаз какадарзавач, Россияда авай дуст­вилин гьалар вичиз рикIивай хуш я лагьана. Франциядай ва Испаниядай тир спортсменрин фикирни ихьтинди тир.

— Чи уьлкведин СМИ-ри Россиядикай вуч кхьизватIа, вуч къалурзаватIа, зун кьасухдай килигнач. Заз жуваз ­акваз кIанзава ина гьалар гьикI ятIа. Чаз телевизордай къалурзавай хьтин уьмуьр ина авач, къарши яз, куь уьлкведа вири хъсан я. Чун кьабулай къайдадални чна шадвалзава. Хъфейла, за Россияда гьикьван хъсан ятIа, лугьуда, — алава хъувуна столдал къугъвадай теннисдай спортсмен Джанни Превила (Франция).

Шадвилелди а кардикай хабар гуз кIанзава хьи, и акъажунра тхэквондодай Дагъустандин хкянавай командадик кваз иштиракай луткунви Замир Шихамадов (80 кг-дилай гзаф заланвал авайбурун арада) къизилдин медалдиз лайихлу хьана.

Россиядин хкянавай 1-командадик кваз (акъажунра Россиядин кьве составди иштиракна, вири санлай  — 495 спортсменди) иштиракай Назим Саидов (60 кг-дал къведалди заланвал авайбурун арада) командайрин арада — 1 чкадиз, кьилдин зачётда ам гимишдин медалдиз лайихлу хьана. РикIел хкин, Н.Саидова тренер Садир Айвазован гъилик вичин устадвал хкажзава. Ам Мегьарамдхуьруьн райондай я.

СтIал Сулейманан райондин Кьасумхуьрел ДЮСШ-да тренер, дзюдодай дуьньядин чемпион Тельман Къурбанован гъилик вердишвилер къачуз­вай Рамалдан Магьарамова и акъа­жунра 71 кг-дин заланвал авайбурун арада самбодай буьруьнждин медаль къазанмишна. РикIел хкин, алай йисуз кьиле фейи Россиядин чемпионатдани ада 3-чка кьунай.

Рагнеда Рамалданова