И йикъара “Лезги газетдин” редакциядиз “Рубаияр” тIвар алаз 2009-йисуз акъатай ктабдин автор, шаир Саирата зенг авуна. Ада газетдин 2017-йисан 15-июндин нумрада вичин са рубаи Марьям  Алискеровадин  тIвар алаз чапнавайдакай хабар гана. Агъадихъ чна кIелзавайбуруз кьве автордин рубаини раижзава:

Юргъ акатна, рахазва рикI чIаларал,

КукIур хъийиз лал тир гьарфар чарарал.

Цуьк тагъанмаз, гатфар завай къакъудна,

Физва уьмуьр, лепе хьана, гарарал…

(Саират. “Рубаияр” ктабдин 199-чин).

 

Рахазва рикI, ишез вири чIаларал,

Тазва гелер, кхьиз лацу чарарал.

Цуьк тавунмаз уьмуьр завай къакъудна,

Зи мурадри лепе гузва гарарал.

(Марьям  Алискерова. “ЛГ”-дин 2017-йисан 24-нумра ).

Гьакъикъатдани, Марьям Алискеровади Саиратан бендинин рифмаярни тикрарзава, авторди ачухарзавай фикирарни, рубаидин пуд лагьай цIарни (амай цIарара дегишвилер ава).

Къейд ийин хьи, лезги литературада са шаирди маса шаирдин фикирар, образар, тамам цIарар тикрарзавай дуьшуьшар садни кьвед авач. И месэладай тамам диссертациярни кхьиз жеда. Сад масадан таъсирдик акатзавай, садаз масадан эсеррикай ерли хабар авачиз, жуьреба-жуьре чкайра уьмуьрзавай авторри сад хьтин шиирар теснифзавай чIаварни авачиз туш. Ихьтин вири дуьшуьшра тайин авторрал угъридин тагъма эцигунни кутугнавач.

Винидихъ къейднавай дуьшуьш газетдин чинал гъуналди, чна “тамуз ван хьун патал тараз якIв язава”. Мукъаят хьухь, ли­­­те­ратура, цIийиз акъатзавай ктабар гзаф кIела, цIийи хатIунин, та­за фикирдин, надир кIалубдин, кесерлу образдин суракьда хьухь. Анжах и вахтунда бажарагъ авай касдилай тешпигь авачир затI арадал гъиз жеда.

Векил Тархаров