“Регьимлу хьухь, инсанар!”
Мерд Али
Вад йис идалай вилик, 2014-йисан апрелдин вацра, вичин камаллу уьмуьрдин саки са пай хайи халкьдин руьгьдин къулаз — “Лезги газетдиз” серф авур зун чи коллективди шад гьалара ял ягъиз рекье туна. Газетдин кьилин редактор Агъариза Саидовахъ элкъвена за лагьанай: “Зун, жуван руьгь ва рикI хайи коллективда амаз, квехъ галаз айрутмиш жезва. Редактордин къаматда аваз, куьнни за къужахламишзава. Умудлу я, чи арада гьуьрмет-хатур амукьда…”
ГъалатI хьанач зун кIусни. Гьакъикъатдани, вилерин ишигъ зайиф хьанвай зал кьил чIугваз, са шумудра вири коллектив атана. Идалай алава, зи къайгъуда авайбур за гьисабзавайдалай гзаф ава кьван! Абурун гьакъиндай газетдин чинриз маналу макъалаярни акъатна. Захъ галаз стхавилин сих алакъаяр Омар, Ризван, Алискер Гьуьсейноври, чIехи стха Къурбанан велед Алинесеба хуьнихъ галаз сад хьиз, абуру “Лезги газет” кхьиникни чпин еке пай кутазва.
Зун инал гьеле Махачкъала, Каспийск, Къизляр, Дербент шегьеррай, Мегьарамдхуьруьн райондай ва маса чкайрай зал кьил чIугваз къвезвай багърийрикай, къавум-къардашрикай, танишрикай рахазвач. Зайиф инсандал кьил чIугун, адакай хабар кьун мергьяматдин еке лишан, сувабдин кар я. Инсанрин юкьва хьайиди, гилани амайди кьатIузва, за. КIвале вири жуьредин шартIар яратмишнавай веледрикай рахазвач.
Хайи хуьруькай кхьенвай ктабда гьатнавай кьван нурлу тIварар акурла, чи руьгьдин амадаг Даир Бейбалаева хабар кьунай: “Казим муаллим, и вири тIварари ви хайи хуьруьз нур гузвани?” “Эхь!” — куьрелди жаваб ганай за. А нурарик зунни ква эхир!
Зи коллектив секин туш. Шихмурадов Шихмурада, Бейбалаев Даира, Гьажимирзоев Шагьисмаила, Ибрагьимов Наримана, Мерд Алиди гьар сеферда зенг яда, хабарар кьада! Суварар тебрикда…
“Казим халу”, лугьуз, зенг яда къе вичи яшайишдин рекьяй къуллугъзавай отделдин редактор Рагнеда Рамалдановади. Заз хайи бубадиз, камаллу насигьатчидиз хьиз, гьуьрметзава ада. Им бес са бахт тушни!
ГьакI газетдин кьилин редактор Мегьамед Ибрагьимова ва адан заместитель Муса Агьмедова Казим буба садрани рикIелай ракъур тийизвайди за гьиссзава. И жуьредин гьуьрмет-хатур къазанмишун, лугьудайвал, Сад Аллагьдин патай еке гунуг я…
И йикъара зи патав вичин яшаризни, тIалризни, мекьеризни килиг тавуна, Рутул райондин Хъуьлуьдрин хуьряй мектебда санал кIелай юлдаш Саид-Агьмед атанвай.
Зи яратмишунриз дериндай къимет ганвай Исламудин Гьусейнова неинки зал кьил чIугуна, гьакI вичин рикIин тIалризни килиг тавуна, за кхьенвай “Агъалар” пьеса сегьнеламишунин къайгъуйрик квайди малумарна.
И йикъара Мегьарамдхуьруьн райондин Муьгъверганрин мектебдин муаллим Гьажимурадов Абдулгьашим мугьман хьана. Ада лагьайвал, зи патав ам, мектебда вичи гузвай дидед чIалан кьве тарсни туна, Рамазандин пак вацран йикъар я лагьана, атанва. Виликамаз суварар мубаракна.
Яргъал йисара хайи халкьдин руьгьдиз къуллугъ авур и кас са шумудра зи хайи хуьруьз ва мектебдизни мугьман хьанай. Гьатта тарсарани ацукьнай, коллективда арадал атанвай чIуру гьалар секинариз, камаллу меслятарни ганай… А дуствал гилани хуьн чешнелу кар тушни бес!
Чи арада хайи хизанрикай, абурун кьадар кьисметдикай, мектебра дидед чIал гуникай, хайи газетдикай, “Вахтар ва инсанар”, “Шалбуздагъ” телепередачийрикай хейлин суьгьбетар кьиле фена…
За гьиссзава: зун инсанрин юкьва ама, зайифвилер залай алудзава. Вилериз аквазмач лагьана, руьгьдин няметривай зун къакъуднавач. Зал кьил чIугвазвай, зав рахазвай инсанрихъ галаз зун Лезги ватанда фикирралди, рикIел хкунралди къекъвезва. Рутула, Ахцегьа, Гиярда, Гилидал, Ялцугъа, Къурушдал, КIирида, Хуьруьга…
Сагърай куьн вири, зи ватанэгьлияр! Пак Рамазандин сувар мубаракрай квез, азизбур!
Казим Казимов
