2021-йис патал “Лезги газетдин” 10 ва адалай гзаф экземплярар кхьиз, пулдин такьатар редакциядив агакьарай вири рухвайризни рушариз чна рикIин сидкьидай сагърай, куь руьгьдин жумартвал мадни артух хьурай лугьузва.
Агъадихъ чна абуруз ЦIийи йисан тебрикар рекье твазва. ТIварар алфавитдин къайдада гузва.
Дагъустандилай къеце
Абасов Мамедаз — Красноярск шегьерда яшамиш жезвай карчидиз:
“Сибирь акьван туш яргъа”,
Лугьузвай хьиз, Мамеда
Ийизва чаз лап мукьва
Хатурарни гьуьрметар!
Агъажан ва Рустам Адигуьзеловриз — Москвада яшамиш жезвай карчийриз, къурушвийриз:
Куьв гекъигда Къурушар —
Европадин кукIушар!
Зегьметчияр — карчияр,
Картариз я чеб ухшар!
Агъамов Загьираз — Москвада яшамиш жезвай духтурдиз, хъартасвидиз:
Эй гьуьрметлу лезги хва,
Гурай мад ваз верги хва!
Ачух хьурай ви кьилел
Цавар михьи, аби, хва!
Балакишиев Заураз — Краснодар шегьерда яшамиш жезвай вурварви карчидиз:
Гъиле мягькем кар аваз,
Герек тир шартIар аваз,
Чидайбурун мецера
Ви гьуьрметлу тIвар ава!
Керимов Арифаз — Москвада ФЛНКА-дин регьбердиз:
“Меденивал лезгидин
Хьун лазим я гуьзгуьдин!”
Женг чIугвазва чи хци
Зайиф тежер жезбидин!
Къаинбегов Низамидиназ — Санкт-Петербургда яшамиш жезвай журналистдиз, меценатдиз:
Мукьва я чаз Луткунар,
Авай чIехи кьатIунар!
Къимет гъида гьамиша
Къадим гьар са затIунал!
Мамедов Самираз — Новочеркасск шегьерда яшамиш жезвай машинистдиз, игъирви хциз:
Яшамишрай Игъирар —
Къадим рекьер, жигъирар!
РикIел хкиз шиирра,
Женгинава шаирар!..
Мегьамедмирзоев Маратаз — Санкт-Петербургда кардик квай “Берекат” компаниядин гендиректордиз:
Берекатар Гуьргендин
Гурлубур я, кьетIен тир!
Мердвал чIехи багъишда
Агакьай гьар мескендиз!
Мегьтиханов Русланаз — Москвада яшамиш жезвай миграгъви хциз, “Леки” фондунин векилдиз:
Хва экъечIна Миграгъай,
Кард хьиз, рагай къарагъай!
Руьгь хуьн патал миллетдин,
КуькIуьрзава чирагъар!
Рамазанов Гьуьсейназ — Москвада электроугольный тадаракрин заводдин гендиректордиз, къурушви хциз:
Тадаракар лап цIийи
Багъишзава уьлкведиз.
ЧIални хуьзва паквилив,
Дидед хурун некIедин!
Сафаралиев Гьажиметаз — РФ-дин Госдумадин депутатдиз:
Сагърай, хва, ви сейливал,
Чир тахьурай къуьруьвал!
Гьуьрметарда мад пара
Гьар са кIвали, хуьруь ваз!
Шайдаев Зурабаз — Санкт-Петербургда яшамиш жезвай карчидиз:
Тахьун патал къураба,
Кагьрабадихъ — кагьраба,
Ирс хуьз жуван миллетдин
Чирзава чаз Зураба!
Эмиргъаев Альбертаз — Алтайда яшамиш жезвай карчи архитIви хциз:
Дагъви хци Алтайда,
Чна руьгьдай кьатIайвал,
Асирризни апайдай,
Артмишзава ацIайвал!
Дагъустандин шегьеррани районра
Ахцегьа
Абдулкеримов Магьмудаз — “Просвещение” фондунин регьбердиз:
Мерд веледрин бубадин
Захавал я зурбади:
— Акьул, камал хуьн патал,
Хкягъиз хьухь арха дуьз!
Дербентда
Сардар Абилаз — писателдиз, юристдиз, алим — меценатдиз:
Чидай кар туш Сардарриз,
Хъсанвилер мадариз.
Куьмекдин гъил ачух я,
Килиг тийиз кьадардиз!
Сулейман-Стальский районда
“Рычал-Су” заводдин коллективдиз:
Абукевсер булахдин
Вуч гекъигда дамахдив!
Яд ятIани, рикI ава,
ЦIелхем хуьдай чахмахдин!
Эмиргьамзаев Рамазаназ — пенсионердиз, ветерандиз:
Чидач артух рахунар,
Машгьурзава Рухунар:
Хкажзава мердвилив
Булвиликай балхунар!
Каспийскда
Агьмедов Тагьираз — “Каспий — теплосервис” ООО-дин гендиректордиз:
Гьазурбур я женгиниз,
Къулайвилер таъминиз.
На лугьуда, рухвайри
Къилих хуьзва Ракъинин!
Гьажибубаев Назираз — “Дагдизель” заводдин коммерческий директордин заместителдиз:
Алакьзава битмишиз
Руьгьдин кьетIен емишар.
Им адет я чи хцин,
Къилих жедач дегишар!
Жаватов Абдулвагьидаз — Каспийск шегьердин депутатрин Собранидин председателдиз:
Къуй абадвал шегьердин
Фирай цIийи бегьердихъ!
Экуь ийир тегьерда
Чил экуьнин сегьерди!
Магьамдалиев Яралидиз — теплосетрин зегьметчидиз:
Бубад хва я вафалу,
Кеспи чида сафалу!
Гьавиляйни фу незва
Виридалай гьалаллу!
Фатуллаев Имамудиназ ва Азизов Абдуллагьаз — дуьм-дуьз механикадин заводдин гендиректордиз ва кьилин бухгалтердиз:
Вуч агакьда дуьзвилив —
Гьакъикъатар хуьз вилив!
Ачухзава суфраяр
Мердвилелди чи вилик!
Махачкъалада
Азаев Жабираз — культурадин “Къуруш” центрадин регьбердиз:
АватIани четинвал,
Кьабулзавач секинвал.
Чун паталди серфзава
Авай гьар са мумкинвал!
Асаханов Шагьпазаз — эминхуьруьнви карчидиз, меценатдиз:
Крар патал медени,
Кутан тийиз лекени,
Акъвазда чи таъсибда,
Мермер хьана, мягькемдиз!
Велиев Эзединаз — ДГУ-дин математикадин факультетдин доцентдиз:
Вуч я рикIин къенивал,
Авачиз са манийвал,
Газет патал, руьгь патал
Хуьзва ачух кIанивал!
Гьамидов Фахрудиназ — къанун-къайда хуьнин къурулушдин къуллугъчидиз:
Вафалувал къуллугъдиз
Хуьзва рикIин буйругъди:
— Рехъ тагурай садани
Шитвилизни шулугъдиз!
Диярханов Вакъифаз — “Хатасуз Дагъустан” ГКУ-дин директордиз:
Хатасузвал хуьн патал,
Крар вилик фин патал,
Къуватар чи садзава
Рагъ пелевай син патал!
Исмаилов Тагьираз — ДГТУ-дин президентдиз, Халкьдин Собранидин депутатдиз:
Хуьруьг Тагьир шаир я,
ЧIални гьикьван магьир я!
Гьа чIал патал хазина
Хуьзва чаз И.Тагьира!
Къазимегьамедов Нариманаз — РД-да РФ-дин МЧС-дин Кьилин управленидин начальникдиз, генералдиз:
Мусибатар гьар жуьре
Ийида фад секинар.
Гьам шегьерда, гьам хуьре
Килфетар хуьз кефина!
Магьмудов Магьмудаз — девирдин карчидиз, меценатдиз:
Хъсан чида карчивал,
Кутадач са харчивал!
Руьгь хуьнизни викIегь я,
Герек атай гьар чIавуз!
Магьмудов Фаргьадаз — “Махачкъала” автоцентрадин сагьибдиз:
ЦIийи хъийиз машинар,
Къачузва аферинар.
Халкьдин руьгьни хуьн патал
Ава мягькем хазина!
Мирзегьасанов Насрудиназ — 12-нумрадин школадин директордиз:
Машгьурбур я Зугьрабар —
Женнетдиз я барабар!
Руьгь хуьдайла миллетдин,
Маргьаба я, маргьаба!
Мирзегьасанов Рамизаз — 10-нумрадин юкьван школадин директордиз:
Баркалла ваз, бубад хва!
Таъсибдиз я зурба хва!
Къуй несилри хуьз хьурай
Гьар са михьи къуба, хва!
Рамазанов Рамазаназ — РД-дин цIаяр кьуниз акси къурулушдин кьилин пешекардиз:
ЦIузни вацIуз буйругъда:
— Акъваз халкьдин къуллугъда!
Завалвилин звал алаз,
Тахьурай сад шулугъда!
Салагьов Агъаметаз — ДГТУ-дин преподавателдиз, игъирви хциз:
Чидайди хьиз вижеваз
Техникадин зурбавал,
Гьамишанда винева
Газетдизни архавал!
Ханбалаев Назимаз — Проектрин институтдин гендиректордиз:
Мердвал рикIин аку тIун,
Жагъизвач чаз гекъигун.
Чидай хьиз туш хкудун,
Амай кьадар эцигун!..
Шагьбанов Низамаз — 13-нумрадин гимназиядин тарихдинни НВП-дин муаллимдиз:
Низам лугьур аламат
Герек я чаз виринра,
Руьгь хуьн патал саламат
Рагъулрани серинра!
Эсетов Азединаз — ДГМУ-дин доцентдиз, Халкьдин духтурдиз:
Лезги тIварцIин къадимвал
ЧIехиз кIанда даим ваз!
ГьакI гьавая лугьузвач
Чи руьгьдин хва — Гьаким ваз!
ТIварар кьамир лагьай куьмекчийриз:
Кар алани тIварарал?
Зар алаз хьуй крарал!
Куьн рикIеваз дастанар
Гъида чна чарарал!
Суфрадихъ мирзевал авур жувазни:
Женгина хьун медени
Ашукьвал я ваз кIани.
Халкьдин рикIе, декIени,
Яшамиш жен ви мани!
_____________________________________________________________________________________________
Ван хьурай!
Ихьтин къуншивал!
ЦIийи йис патал “Лезги газет” кхьиник гзафбуру чпин пай кутуна. Лап тафаватлу хьайи хейлин ксариз чи тебрикарни рекье тунва. Сагърай вирибур — “Лезги газетдиз”, чIалаз, лезги руьгьдиз багърибур!
Амма чи газетдиз чи къуншийрини гьуьрметзавайди, ам машгьур ийиз, алакьдайвал куьмекарни гузвайди чир хьанайтIа кIанзавай.
Ингье РД-дин халкьдин духтур, ДГМУ-дин кафедрадин доцент Азедин Мурадович Эсетова чаз хабар гайивал, адахъ галаз санал кIвалахзавай эрмени халкьдин векил, ДГМУ-дин гинекологиядинни акушерстводин кафедрадин доцент Стефанян Натэлла Амлетовнади, вичин къуншияр лезгияр я лугьуз, чIехи ашкъидивди “Лезги газет” кхьенва! И кар акур лезги рушарихъ хайи газет кхьинин патахъай са кинни, шаклувилин са суални амукьнач! Вири санлай 24 касди “Лезги газет” кхьена!
Им бес тарифдай ва тебрикдай кар тушни!
Сагърай вун, Натэлла Амлетовна! Ви руьгьдин девлетар мадни артух хьурай!
КIанда ихьтин къуншивал!
Багъишдайди хвешивал!
Къуй садазни чир тахьуй,
Вуч я руьгьдин гишинвал!
Хайи чIалан ван тежер,
Кьисмет тахьуй бишивал!
Гьа кар жеда инсандин
Усалвални ичIивал…
Чин гьазурайди Мерд Али я.
