Вичин ери-бине Кьасумхуьрелай тир Икрам Алискерован (ам 1992-йисуз дидедиз хьана) тIвар газет кIелзавайбуруз фадлай таниш я. Чна адан агалкьунрикай муштулухар садрани кьведра ганачир. Нубатдин шад хабар чав мад Бахрейндай агакьна. 25-мартдиз “Brave CF 49” турнирдин сергьятра аваз Россиядай тир 5 спортсменди чпин устадвал къалурун лазим тир. Чна, гьелбетда, Икрам Алискерован (KNK-Dagestan клубдин векил) бягьс рикIик гъалаба кваз вилив хуьзвай… Сербиядай тир Миро Юрковичахъ галаз кьиле фейи бягьс вахтундилай вилик акьалтIна. Гьеле 2-раундда, гъилиз тIарвал гудай къайдадикай (прием кимура) менфят къачуналди, Икрама инанмишвилелди нубатдин гъалибвал къазанмишна. Аферин чи кьегьалдиз!
РикIел хкин: и бягьсни кваз чи ватандашди пешекарвилин спортда 11 сеферда (абурукай 3-сеферда галаз-галаз) гъалибвал къазанмишна, анжах са сеферда ам кумукьна. Идалай виликни И.Алискерова (алатай гатуз, коронавирус себеб яз, и турнир са шумудра кьулухъ янай, эхирни ам 17-сентябрдиз кьиле тухванай) Бахрейнда кьиле фейи “Brave CF 41” турнирдин кьилинди тир бягьсинин 3-раундда (анани гъилиз тIарвал гудай къайдадикай менфят къачуналди) Денис Тюлюлинал гъалибвал къазанмишнай. Ам лагьайтIа, икьван чIавалди спортдин рекье вири гъалибвилер вахт куьтягь жедалди къазанмишнавай пагьливан тир. Икрама 2019-йисуз Саудовский Аравияда кьиле фейи “Brave CF 33” турнирдани инанмишвилелди гъалибвал къазанмишайдини рикIел хкин. А чIавуз адаз Диего Гонзалез кумукьнай, бягьсни нокаутдалди акьалтIнай.
Къейд авун лазим я хьи, Кьасумхуьрел кардик квай дзюдодинни самбодин ДЮСШ-да сифтегьан вердишвилер къачур Икрам Алискерован агалкьунрик адан тренерар-стхаяр тир Къурбановрин лайихлу пайни ква. ИкI, винидихъ тIвар кьунвай спортдин школадин директор ва тренер, дзюдодай дуьньядин чемпион, спортдин международный классдин мастер Тельман Къурбанова виликдай захъ галаз авур суьгьбетда хабар гайивал, Икрам Алискеров сифте яз 5-классда аваз самбодин сирер чирунив эгечIна. Гьа сифте йикъарилай ада вич еке умудар кутаз жедай викIегь спортсмен тирди къалурнай. Руьгь кваз ва къуватар гьайиф татана чIугур зегьметди хъсан нетижаярни гана — Икрам Алискерова спортда къазанмишнавай агалкьунри и карни хъсандиз субутзава. Ада 2012-йисуз Кишинёвда женгинин самбодай кьиле фейи Европадин чемпионатда 1-чка кьуна ва и чIавуз ада международный классдин спортдин мастервилин нормани тамамарна. Спортдин и жуьредай ада 2016-йисуз Россиядин чемпионвилин тIвар ва 2017-йисузни гимишдин медаль къазанмишна. Спортсмендихъ самбодайни виниз тир агалкьунар ава: ам 2014 ва 2015-йисара дуьньядин Кубокдиз, 2016-йисуз дуьньядин ва 2017-йисуз Европадин чемпионвилин тIварариз лайихлу хьана.
29-мартдиз Сулейман-Стальский районда пагьливан шад гьалара къаршиламишунин мярекат кьиле фена. Райадминистрациядин пресс-къуллугъди хабар гузвайвал, ана райондин кьил Нариман Абдулмуталибова, РД-дин Халкьдин Собранидин депутат Гьамидулагь Мегьамедова, райондин спортдин комитетдин векилри, спортсменри, кьасумхуьруьнвийри, мектебра кIелзавайбуру иштиракна.
Машгьур пагьливандин ва шадвилин мярекатдин иштиракчийрин вилик кьелни фу гвайбур фена. Спортсмендин агалкьунар райондин вири жегьилар патал чешне хьуник умуд кутуналди, Н.Абдулмуталибова, Гь.Мегьамедова И.Алискероваз нубатдин гъалибвал мубаракна, чандин сагъвал, хушбахтвал хьун алхишна.
«Лезги газет»
