Белиж поселокдин 2-нумрадин юкьван школада са шумуд йис идалай вилик аквадай хьтин дегишвилер хьана: директорвиле РФ-дин образованидин гьуьрметлу работник Агъабегова Анжелика Зугьрабовна тайинарна.

Ам 1972-йисан январдиз Коми Республи­кадин Сыктывкар шегьерда военный къул­лугъчи, полковник Зугьрабан хизанда дидедиз­ хьана. Ана военный городокда авай юкьван школа акьалтIарна. 1989-йисуз Сыктывкардин­ госуниверситетдин филологиядин факультетдик экечIна. 5-курсуна кIелдайла, Белиж по­се­локдай тир стоматолог Гьарунани Анжеликади кьисметар сад авуна.

ИкI 1994-йисуз военный къуллугъчидин   руш Белиж поселокдиз куьч ­хьана. Гьа и йисалай поселокдин 1-нумрадин школада урус чIаланни литературадин муаллим яз кIвалахиз гатIунна. 2002-йисуз ам 2-нумрадин юкьван школада кIвалахунив эгечIзава. А вахтунда школадин директор рагьметлу Амахан Вагьабов тир.

2011-йисуз жегьил пешекардин алакьунар, коллективдин арада къазанмишнавай лайихлу гьуьрмет акур школадин директор Ж.Тагъиева А. Агъабеговадал тамам тушир классрин завучдин къуллугъ ихтибарзава. И къуллугъдал ада 2018-йисалди кIвалахна.

Завуч яз кIвалахай ирид йисуз ада вич кеспидал рикI алай, хиве кьур гаф кьилиз акъуддай, муаллимрин коллективда, диде-бубайрин, аялрин арада алакъаяр мягькемардай, кар алакьдай тешкилатчи яз къалурна.

2020-йисуз Анжелика Зугьрабовна поселокдин 2-нумрадин СОШ-дин директорвиле тайинарна.

Ада тарсар  гайи Аминат Вагьабова, Светла­на Ибрагьимова, Алина Айбатова къизилдин медалриз лайихлу хьана. Алай вахтунда абуру пудани мединститутра кIелзава. Выпускник, спорт­смен, меценат, каратэдай тренер-пре­по­да­ва­тель Давудов Тажира школадиз вичивай жедай куьмекар гузва.

Шаз школада 306 аялди кIелзавай. 9 ва 11-классра кIелзавай вири аялри ОГЭ-ни ЕГЭ агалкьунралди вахкана. Кьве аял чешнелу кIе­лунрай къизилдин медалдиз лайихлу хьана. Школада пешекарвилин квалификация авай 47 муаллимди зегьмет чIугвазва. Абурукай 30-даз кьилин ва 17-даз юкьван пешекарвилин образование ава. Муаллимар тир Гуьльнара Ибрагьимовадиз, Гуьл Бабаевадиз ва масабуруз РФ-дин образованидин гьуьрметдин работник лагьай тIварар ганва. Школада предметрин ва сифтегьан классрин 26 кабинет кардик ква. Абурукай сада алай аямдин мультимедийный техника, муькуьда интерактивный доска ава. Эхиримжи пуд йисуз школада «Точка роста» программадай биологиядин, химиядин, физикадин ва технологиядин предметрай кьуд кабинет ачухнава.

Мектебдин дарамат 1967-йисуз эцигнавайди я. Икьван йисара дараматдиз цIийикIа туькIуьр хъувун акунвачир. 2022-йисуз Анжелика Зугьра­бовнадин алахъунралди дарамат цIийикIа туь­кIуьр хъувунин программадик кутуна.

Лагьана кIанда, школа тамамдиз цIийи хъхьанва. Чимивилин, экверин, цин линияр цIийи­­буралди эвезнава. Школадин вилик патан акунар, куьгьне полар, кабинетрин цлар, дегьлизар вири цIийи хъувунва. ЦIийи ракIарар, дакIарар кутунва. Хъсандиз кIвалах вилик тухун патал классар, кабинетар къулай мебелдалди, гьакIни алай аямда лазим къвезвай тадарак­ралди таъминарнава. Аялриз чими тIуьнар гудай кухня, столовой, актовый зал кардик ква. Спортдин залдани ремонтдин кIвалахар кьиле тух­ванва.

Дараматдин цIийи хъувунвай михьи ва экуь кабинетри кIелунин цIийи йисуз 348 аялдиз ракIарар ахъайна.

Районда кьиле фейи августдин педсоветдал Дербент райондин кьил М. Рагьимова и школада кIвалахзавай пуд муаллимдиз — Лариса Вагьабовадиз, Лариса Ханмегьамедовадиз ва Муь­гьуьббат Исаевадиз — «РФ-дин образованидин гьуьрметлу работник» лагьай тIварар ганвайдакай малумарна, абурув талукь документар вахкана.

– Школадин директор – чIехи коллективдин регьбер. Мектебдин кIвалахар идара авунилай гъейри, куьн тарсарни гуз агакьзавани? – хабар кьуна за.

— Регьбер гзаф жавабдар кIвалах я. Гзаф ­сабурлувал, инсанрихъ галаз рахадайвал чир хьана кIанда. Аялрихъ галаз тарсар тухун зун патал лезет я. Бязи вахтара аялрин вилериз ­кил­игайла, заз анрай аялдин рикIин михьивал аквада, и арада жувазни и михьивиле «цIраз» кIан жеда. Гьам тарсар тухудайла, гьам регьбервал гудайлани, зал ахьтин четинвилер ацалт­завач.

– Муаллим яз, куьн аялрик гьихьтин къилихар кутаз алахъзава?

— Сифте нубатда ватанпересвилин, милли адетрал амал авунин, халкьдин тарих ва дидед чIал чирунин гьиссер кутаз алахъзава. Тарсара, классдин сятера, кружокра чна аялрин чирвилер гьар са патахъай деринардай къайдада кIвалахзава. Ватанпересвилин темадай мярекатар тешкилзава. Цлан газетар акъудзава. Юнармиядин отряд кардик ква. «Российское движение школьников» тешкилатдик квай аялри школада ватанпересвилин рекьяй хъсан кIвалах тухузва. Вири и мярекатри абурун руьгь мягькемарзава, абуруз Ватан кIанарзава.

– Куьне регьбервал гузвай йисара школадихъ гьихьтин агалкьунар хьанва?

— Завай конкурсра, олимпиадайра,­ спортдин акъажунра кIвенкIвечи ва приздин чкаяр къазанмишнавай аялар, пешекарвилин­ устадвиляй муаллимри конкурсра къазанмишнавай агалкьу­нар, школадиз къвезвай аялрин­ кьадар 42 аялдин артух хьун ва, кьилинди, школа капремонт авуна, муаллимризни аялриз­ кIвалахдай ва кIелдай къулай шартIар арадал­ гъун къейд ийиз­ жеда. Алай йисуз кIелунра кьетIен агалкьунар хьунай Тагъи Тагъиев ва Ислам Ибрагьимов къизилдин медалриз лайихлу хьана.

Заз инал агалкьунар арадал атун патал за­вуч Гуьл Абасовадин, лап хъсан муаллимар тир Загьидат Айвазовадин, Минара Азимовадин, Маиса Абдурагьмановадин, Эльмира Агъахано­вадин, Гуьзел Абасовадин, Жагьан Гьажиевадин, гьакIни гьуьрметдин тIварариз лайихлу хьанвайбурун зегьмет къейд ийиз кIанзава.

Анжелика Зугьрабовна гьуьрметлу ва туькI­вей хизандин кьил я.  ЧIехи руш Тахминади Екатеринбургдин медакадемия акьалтIарна, ана кос­метолог яз кIвалахзава. ЧIехи хва Ахарата Саратовдин мединститут акьалтIарна, ам Екатеринбургда стоматолог я. ГъвечIи гада Камала стоматологиядин техникумда кIелна, стоматолог яз кIвалахзава. Анжелика Зугьрабовна пуд хтулдин бахтлу бадени я.

Къагьриман Ибрагьимов