(Хьайи кар)

Дяве куьтягь хьанвай вахтар тир. Уьлкведи чкIан­вай хуьрерни шегьерар са жуьреда хьайитIани къайдадиз хкизвай. Виринра ремонтрин, цIийибур эцигна кардик кутунин ва халкьдиз сифте нубатда герекзавай кIвалахар кьилиз акъудзавай. Анра лагьайтIа, итим — паб, гъвечIи — чIехиди талгьуз, вирибуру иштиракзавай. Хуьруьн майишатдихъ галаз промышленностни кIвачел ахкьалдарна кIанзавай. Пек-партал ва маса затIар акъуддай цехар, заводарни фабрикаяр саки вири барбатIнавай душманди. Кьилел-кIвачел, тандал алукIдай шейэр инсанриз гьеле бес жезвачир. Гьа ихьтин дар вахтунда шегьердай кIвализ хквезвай Къиличаз, автобусдин патав хъфидайла, садан гъиле лацу тумаждин сандалар акуна. РикI ацукьна адан абурал. Ада сифте яз вичиз аквазвай и гуьрчег кIвачин къапар вичин рушаз къачун кьетIна. Хабар кьуна, гузвани-гузвачни?

— Абур вун патал цванвайбур я, хванахва, — лагьа­на иесиди, — къачу, жагъай хьиз жеда ваз. Къилича са легьзеда фикирна, абур маса къачун кьетIна. Гъил вег­ьена и жибиндиз, а жибиндиз, анра амай-амачир кепек-шигьи вири акъудна капал, гьисабна, бес жедани-жедачни… Бахтунай хьиз, са манат кимиз, лагьай ­къиметдин пул жагъана. Сад бес жезвач, мад сеферда­ чун чаз, белки, ахкван, агакьарда, — лагьана Къилича.

— Къайгъу авач, гьамиша сад хьиз жедайди туш, — лагьана, иесиди сандалар Къиличав вахкана.

КIвализ агакьайла, Къилича, пака суварин юкъуз­, алукIдай сандалар гъанвайдакай руш Иминатаз муштулух гана. Шад хьана рушаз абур акурла. Ахпа ам са тIимил сефил хьана. Адаз абур гьикI алукIдатIа, кIва­черал гьикI акъвазун герек ятIа чизвачир. Ихьтин кIва­чин къапар адаз сифте яз акунвай. Икьван чIавал­ди адаз авайди резиндин калушар тир. Пака майдин сувар­ тирди, рушарихъ галаз мектебдай вични су­ва­рик фена кIанзавайди Иминатаз чизвай. Ам, кIва­ле авай­бурал алукьни тавуна, къуншидал алай устIар Али бубадин патав фена, вичин фикирдавайвал адаз дерди лагьана. Япарал заланзавай устIарди йифен лап геждалди кIвалахна. Ада сандалриз элкъвена ла­цу тумаждин пинеяр яна. Са тIеквен, са хъиткьер ада тунач, сандалар лацу калушар хьтин затIариз эл­­къуьрнавай. Йифиз­ бегьем ахварни татай Иминат пакамаз фад хьиз Али бубадин патав фена, сандалар вахчуз.

— ТупIарин кIвенкIвера тIал гьатна, чан руш, раб кутаз хкуддай кьван, эхирни, са бубат авуна, ингье ви сандалар.

— Я Али буба, вуна вучна, абур зи сандалар туш хьи, — мягьтелвална Имината.

— Я чан руш, вуна гъайибур я абур, за абуруз багьа тумажни суракьна жагъурна, къунши яз акуна. Масад ахьтин кукIвар хьанвайбурал алахъни ийидачир. Вуна заз кьве манатни зур гьакъи гана кIанзава.

Хъел атана Иминатаз, сандалар гьанал туна, ам пашмандиз кIва­лиз хтана, майдин суварикни адавай физ хьанач, сандалрикайни хкатна… Кьве юкъуз Иминат мектебдизни­ фенач, суварикайни хкатунин, дахди сифте яз къачур сандаларни алукIиз тахьунин гьайиф­ чIугваз амукьна ам.

Райсудин Набиев