«Ассалам алейкум, гьуьр­метлу редакция!

И йикъара зун «Ютубдай» «Пак Къуръандин манайрин таржума — лезги чIалал» ктабдин презентациядиз килигна. А мярекатдин гьакъиндай заз  жуван фикир лугьуз кIанзава.

Ямин гьажиди (Къуръандин манаяр лезги чIалаз элкъуьрнавай диндин алим Ямин Мегьамедов — ред.) ихьтин таржума авун чи халкьдин тарихда зурба вакъиа я. Идалай гъейри, им маса халкьарин виликни дамахдай кар я! Зи фикирдалди, ихьтин лайихлу кардай а касдиз разивал малумарун, пишкешар гун, са гафуналди, адан зегьметдиз къимет гун лазим я.

Презентациядин мярекат­да­ чи халкьдин вилик-кьилик квай ксари иштиракна: ми­нистр­ри, районрин кьилери,­ депу­татри, спортсменри, кар­чий­ри ва масабуру. Амма заз, гьайиф хьи, а мярекатдал сада кьванни Къуръандин манаяр таржума авур касдиз са еке пишкеш гана ва я гун хиве кьуна акунач. (Мярекатдилай гуьгъуьниз ганатIа заз чидач. Ахцегь райондин кьили иллаки кьетIендиз вичин гаф лугьун лазим я, гьикI хьи, Ямин гьажи гьа райондай я).

Чи халкьдин векилрикай сад спортдин рекьяй дуьньядин чем­пион хьайила, адаз пишкешар гузва кьван: цIийи машин, кIвалер ва маса багьа савкьатар. Гьа и жуьреда Къуръандин­ манайрин таржума авур касдизни пишкешар ганайтIа, дуьз кар жедай. Зи фикирдалди­, икI авунайтIа, къведай несилриз­ни хийир ва хъсан чешне, Шариатдин алимриз гьуьрметун жедай! Сагърай куьн!».

Керим Гьуьсейнов,

КцIар