Мукьвара чав вичин уьмуьрдин чIехи пай акьалтзавай несилриз чирвилер гуниз бахш авур муаллим Чуру Шихвердиевич Шихвердиев рагьметдиз фена лагьай чIуру хабар агакьна.
Чуру Шихвердиевич 1931-йисан 31-декабрдиз Докъузпара райондин Миграгъ-Къазмайрин хуьре лежбердин хизанда дидедиз хьана. Миграгърин юкьван мектебда 10-классда кIелзавайла, 1950-йисуз, адаз Советрин Армиядин жергейриз эвер гана. Пуд йисуз къенепатан кьушунра вичин буржи вафалувилелди тамамарна. ДГУ-дин физикадинни математикадин факультет куьтягьна, 1959-йисуз Миграгърин мектебда кIвалахал акъвазна. Чуру Шихвердиевича 1960-1970-йисара Къаракуьредин мектебдин директорвална. 1970-1975-йисара ада Къалажухрин мектебдин директорвиле ва физикадинни математикадин муаллимвиле кIвалахна. Пешедай баркаллувилелди зегьмет чIугур вири чкайра адахъ гьуьрмет ва нуфуз хьана.
Ам “Халкьдин просвещенидин отличник” (1967-йис), “СССР-дин просвещенидин отличник” (1979-йис), “РФ-дин умуми образованидин лайихлу работник” (2010-йис) тIварарин сагьиб тир.
Зегьметдин ветеранди, 1975-йисалай инихъ хейлин вахтунда мектебдин профсоюздин комитетдин ва гъвечIи классрин методикадин объединенидин руководитель яз, жегьил муаллимриз лайихлу чешне къалурна, куьмекар гана.
Чна рагьметлудан хизандиз, мукьва-кьилийриз башсагълугъвал гузва.
“Лезги газетдин” редакциядин коллектив
