Мергьяматлувилин “Инсан” фондунин руководитель Мегьамедрасул Агьмедоваз жемятдихъ галаз активнидаказ кIвалахунай, виниз тир пешекарвиляй ва инсанвилин михьи ерияр гегьенш майданра раиж авунай рикIел аламукьдай “Буржи ва намус” медаль ганва. Адав шабагь Махачкъаладин агъсакъалрин Советдин председателдин везифаяр тамамарзавай Абдулмуталиб Гьамзатова вахкана.
“Къе, 8-июнь, яшайишдин рекьяй работникдин Югъ я. Им агьалияр яшайишдин рекьяй хуьнин хиле кIвалахзавай инсанрин пешекарвилин сувар я. “Инсан” фонд Кеферпатан Кавказдин сергьятра виридалайни чIехиди тир ва Россиядин жуьреба-жуьре субъектра яшамиш жезвай миллионралди агьалийриз куьмек гузвай тешкилат я. Заз Мегьамедрасул Агьмедован тIвар кьуналди мергьяматлувилин “Инсан” фондунин кIвалах къейд ийиз иллаки хуш я. Дагъустанвийри квез республика патал заланди тир вахтунда четин гьалда авай агьалийрив куьмек агакьарунай, куьне жемятдин яшайишдин месэлайриз гузвай фикирдай, куь виниз тир пешекарвилин дережадай чухсагъул малумарзава”, — къейдна Абдулмуталиб Гьамзатова.
Мегьамедрасул Гьамзатова, вичин нубатдай, фондунин кIвалахдиз виниз тир къимет гайи вирибуруз рикIин сидкьидай сагърай лагьана ва чеб агьалийрин ихтибар садрани квадар тавун патал мадни хъсандаказ кIвалахиз гьазур тирдакай лагьана.
«Лезги газет»
