Къазахстандин Актау шегьерда яшамиш жезвай чи ватанэгьли Камил Куругълиева мукьвара Будапештда азаддиз кьуршахар кьунай кьиле фейи чемпионатда 3-чка кьуна.
Дуьньядин дережадин акъажунра 150 уьлкведай жегьил спортсменри иштиракна. Камил Куругълиева ана 92 килограммдин заланвал авай пагьливанрин арада 5 бягьс кьиле тухвана.
Къейд ийин, Камила Къазахстанда тренерар тир Роман Агьмедханованни вичин буба Мегьамед Куругълиеван гъилик кьуршахар кьунин сирер чирзава.
Камилан буба Мегьамед Куругълиевакайни 1993-йисуз азаддиз кьуршахар кьунай Грециядин меркезда кьиле фейи дуьньядин акъажунра призер хьанай. Адалай кьулухъни ада жуьреба-жуьре уьлквейра кьиле фейи хейлин турнирра агалкьунралди иштиракна. Алай вахтунда ам Къазахстан республикадин спортдин лайихлу мастер я.
Лайихлу тренердин-бубадин гуьзчивилик кваз спортдал машгъул жезвай Камилахъ гележегда мадни еке агалкьунар хьуник чна умуд кутазва.
«Лезги газет»
