2-декабрдиз Кьасумхуьруьн кьилин мискIинда республикадин дережада аваз диндин мярекат кьиле фена. Къейд авун лазим я, Кьиблепатан Дагъустанда эхиримжи 10 йисан вахтунда диндиз талукьарна ихьтин мярекат тешкилнавачир.
МискIин Мугьаммад Пайгъамбар хайи вацраз — Рабиуль-Аввалдиз талукьарнавай мярекатда иштиракиз атанвай инсанрив ацIанвай. Мевлид Къуръандин аятар кIелунилай гатIунна ва ам Кьиблепатан Дагъустанда РД-дин Муфтийдин векил Магьди Абидова кьиле тухвана.
Мярекатдин сергьятра аваз Сулейман-Стальский райондин кьил Нариман Абдулмуталибов, Избербашдин имам Умарасгьаб Арсланалиев, Дербентдин са мискIиндин имам Къурбан Рамазанов, Махачкъала шегьердин имамрин председатель Закарья Мегьамедов, Сулейман-Стальский райондин имам, лезги чIалал акъатзавай “Ас-Салам” газетдин редактор Гьасан Амаханов рахана. Абуру Мугьаммад Пайгъамбардин кьетIен ерийрикай, къилихдикай, терроризмдикай Ислам патал авай зарардикай, мусурмандин эдебдикайни ахлакьдикай суьгьбетна.
Магьди Абидова Нариман Абдулмуталибовазни Гьасан Амахановаз савкьатарни гана.
Къейд ийин хьи, мевлиддал Сийидхуьруьн имам Ислам Гьамидова лезги ва араб чIаларал нашидарни кIелна.
Диндин межлис кьабулунин дуьа авурдалай кьулухъ вирида санал нисинин капI авуна ва гуьгъуьнлай мевлиддиз талукь суфраяр ачухнавай Кьасумхуьруьн медресадиз рекье гьатна.
5-декабрдиз Махачкъала шегьерда авай Мегьамед Ярагъидин тIварунихъ галай мискIиндани Сулейман-Стальский райондин векилри тешкилнавай мевлид кьиле фена.
Къуй чи Пайгъамбар дидедиз хьайи вацра кьиле тухвай диндин межлисар Аллагьди кьабулрай ва чи Ватанда берекатар артух хьурай!
Агьмед Магьмудов
