Урусатдин инкъилабчи, советрин сиясатдин, гьукуматдин машгьур деятель, вичин ери-бине Кьурагь райондин Штулрин хуьряй тир Михаил Васильевич Лезгинцев (Мегьамед Гьуьсейнов) ва адан баркаллу сихил чи халкьдин арада фадлай машгьур я. Къенин зи ихтилатни тIвар-ван авай Лезгинцеврикай тир чи аямэгьли, театрдинни кинодин бажарагълу актриса Евгения Георгиевна Лезгинцевадикай я.
Ам 1987-йисуз Москвада яратмишзавай интеллигенциядин хизанда дидедиз хьана. Мектеб куьтягьайдалай кьулухъ Евгения ГУУ-дик (государственный университет управления) экечIна ва гуьгъуьнлай зегьметдин рехъ рекламайрин пешедин рекьяй агентствойра, гьа жергедай яз международный машгьур тешкилатрани менеджервиле кIвалахунилай башламишна. Сифтегьан пешедай 2008-2011-йисара кIвалахнатIани, гъвечIи чIавалай сегьнедиз майилвализ эгечIай Евгениядиз им вичихъ галаз кьан тийизвай пеше тирди чир хьана. ИкI, бажарагълу жегьилди вичин вилик цIийи макьсад эцигна: кIвалах алайвал туна, ам Грамматикован тIварунихъ галай алай аямдин кинодин ва телевиденидин управленидин институтдик экечIна ва театрдинни кинодин актервилин пеше къачуна. КьетIендаказ къейдиз кIанзава хьи, дерин чирвилер аваз кIелай Е.Лезгинцевади кьве вуздайни яру дипломар къачуна. Къейд ийин, актрисавилин бажарагъдин цIелхемар гьеле аялзамаз куькIвенвай: гъвечIи чIавуз ада кьуьлердай, манияр тамамардай.
Винидихъ тIвар кьунвай вузрилай гъейри, ада кинодинни театрдин актервилин рекьяй хейлин маса курсарани вичин тежриба хкажна. Актрисади алатай йисара Л.Филатован тIварунихъ галай театрда жуьреба-жуьре гзаф ролар тамамарна. Алатай йисалай, тIвар кьунвай театр агал хъувурдалай кьулухъ, Евгенияди вичин пеше Москвадин “Шалом” театрда давамарзава.
Ада вичин алакьунар кинодани къалурзава. Икьван чIавалди ам жуьреба-жуьре йисара “Школа”, “Мелодрама”, “Детективы”, “Кулагин и партнеры”, “Ложь”, “Новенькая” ва бязи маса фильмайрин эпизодрин ролра къугъвана. Театрдин кIвалах давамарунихъ галаз сад хьиз, гележегда адахъ вичин фильмография гегьеншардай, артухардай фикирар ава. “Театр галачиз завай уьмуьр фикирдиз гъиз жедач. Актрисавилиз зун геж атайвиляй са кьадар четинвилерни жезва”, — лугьузва Евгенияди.
Адахъ вичин яратмишунриз талукь хсуси сайтни ава. Идалайни гъейри, Евгенияди “Ютубда” вичин хсуси канални кардик кутунва, анай гьар садаз адан алакьунрихъ, ятармишунрихъ галаз таниш жедай мумкинвал ава.
Карантин малумарнавай къенин муракаб макъамда ада кинодин ролра къугъунин жигьетдай вичин алакьунар, мукьуфар кIвале арадал гъанвай гъвечIи студияда артухарзава, махсус курсарикай менфят къачузва.
Евгениядиз вичин ата-бубайрин ватан тир Дагъларин уьлкве гьеле акунвач, амма гележегда адаз иниз къведай фикир ава. Къуй адан рикIик квай вири мурадар кьилиз акъатрай!
К.Ферзалиев
