Чи ватанэгьлияр — гьар сана
Урусатдин хейлин шегьерра агалкьунралди кIвалахзавай, илимдин кукIушар муьтIуьгъарзавай лезги алимрин жергедай яз и сеферда чи ихтилат Санкт-Петербургда яшамиш жезвай, вичихъ еке алакьунарни агалкьунар авай духтур-уролог, медицинадин илимрин доктор Наир Сабирович Тагьировакай я.
Ам 1971-йисан 3-апрелдиз Кьурагь райондин КIи-рийрин хуьре чIехи хизанда дидедиз хьана. 1977-йисуз ада Агъул райондин ТпIигърин мектебдиз сифте камар къачуна. Ина 10-классдал кьван кIелна. Гуьгъуьнлай Кьурагьрин 1-нумрадин юкьван мектебда кIелун давамарна ва 1987-йисуз анаг куьтягьна.
1988-йисуз адаз Ватандин вилик буржи тамамарун патал сергьят хуьдай кьушунриз эверна. Старшина яз кьве йисуз намуслудаказ къуллугъ кьилиз акъудна хтай Наира вичин вилик медицинадин рекьяй илимдал машгъул хьунин къаст эцигна. 1993-йисуз ам Санкт-Петербургдин педиатриядин медакадемиядик экечIна, 1999-йисуз агалкьунралди анаг акьалтIарна. Кьилин образование къачур жегьил пешекарди мадни дерин чирвилер къачун, илимдин яцIаз гьахьун кьетIна. 1999-2001-йисара ада клиникадин урологиядин рекьяй ординатурада кIелна.
Наир Тагьирова зегьметдин рехъ 2001-йисуз Санкт-Петербургдин Елизаветинский азарханадин урологиядин отделенида духтур-уролог яз кIвалахунилай башламишна. Гуьгъуьнлай адакай и отделенидин заведующий хьана.
Наир Тагьирован пешекарвилин вини дережадин ерийриз, тежрибадиз талукь яз ада духтурвилин рекьяй куьмек гайи гзаф ксари интернетда разивилин келимаяр кхьенва. Абуру духтурдин алакьунар, чирвилер, азарлубурун патахъай ийизвай къайгъударвал тарифдивди къейдзава. Интернетдин махсус сайтда кхьенвай къейдерай аквазвайвал, Наир духтур азар мукьуфдивди тайинарунин, адан себебар чирунин, ам сагъарунин рекьяй алакьунар авай савадлу пешекар я.
2004-йисалай ада педиатриядин академиядин урологиядин кафедрадин доцентвиле кIвалахзава. 2006-йисуз медицинадин илимрин кандидатвилин диссертация хвена. Ам медицинадин илимдай кхьенвай хейлин макъалайрин автор я.
Шадвилелди къейд ийиз жеда, алай йисан 21-январдиз Наир Сабировича Санкт-Петербургда патологический физиологиядин пешедай медицинадин илимрин докторвилин диссертация хвена.
Жегьил алимдин хизанда кьве хциз тербия гузва. Къуй чи ватанэгьлидихъ сагъвал ва мадни еке агалкьунар хьурай!
К.Ферзалиев
