10-апрелдиз Сулейман-Стальский районда яратмишзавай интеллигенциядин векилринни мектебра кIелзавай бажарагълу аялрин арада итижлу гуьруьш кьиле фена. И гьакъиндай «Лезги газетдиз» райадминистрациядин пресс-къуллугъди хабар гана.

Мярекатда хейлин шаирри, муаллимри, мектебра кIелзавай  33 аялди иштиракна. Шаирринни муаллимрин жергеда Сажидин Саидгьасанов, Абидин Камилов, Нажмудин Шихнабиев, Рамазан Дадашев, Тагъи Мегьамедов, Важибат Насруллаева, Гуьзел Межидова, Назлу Алдербегова, Минаят МутIалибова, Жарият Мегьамедова ва Регина Мирзоева авай.

Яратмишзавай чIехи несилдинни жегьил бажарагърин арада суьгьбетдин къайдада кьиле фейи мярекат ИМЦ-дин хайи чIаларин рекьяй методист Назират Азимовади ачухна. Ада СтIал Сулейманан 150 йисан ва райондин 90 йисан юбилейрин сергьятра аваз тешкилнавай мярекатдихъ авай важиблувални метлеблувал къейдна.

Шаирри чпин тежрибадикай, эдебиятдин бязи сирерикай аялриз ихтилатарна. Бажарагълу аялрини чпи теснифнавай шиирар кIелна. Мярекдал хайи чIал, эдебият вилик тухуниз талукь месэлаярни веревирдна. Мектебра кIелзавайбуру тежрибалу муаллимризни шаирриз жуьреба-жуьре суалар гана. Гьакъикъатдани, ихьтин мярекатрихъ, акьалтзавай несилдик гьевес кутунин, абуруз насигьатар гунин жигьетдай хъсан мана ава.

Мярекатдин эхирдай республикадин «Ата-бубайрин чIал» конкурсда иштиракай Агъа СтIал-Къазмайрин, ЦIийихуьруьн ва Кьулан СтIалрин мектебрин ученикрив шабагьарни вахкана.

«Лезги газет»