Сулейман-Стальский район Дагъларин уьлкве яргъарани машгьур авур зурба пешекарралди хьиз, тамам тухумралдини девлетлу я. Ихьтинбурукай яз, чавай Кьасумхуьрелай тир Алиметоврин баркаллу тухумдин тIварни кьаз жеда. Вилик йисара и тухумдай чIехи дережайрин регьберар, жуьреба-жуьре пешейрин иесияр, алимар акъатна. Мадни шадвал кутадай кар ам я хьи, Алиметоврин тухумдин баркаллу рехъ и жегьил несилдини уьзягъдаказ давамарзава. Абурукай садахъ галаз газет кIелзавайбур танишариз кIанзава.
Карина Альбертовна Алиметова — кьилин категориядин духтур-эндокринолог, медицинадин илимрин кандидат, Дагъустанда “2017-йисан виридалайни хъсан духтур” тIварцIин сагьиб… Гьелбетда, Карина Альбертовна и чIехи дережайриз садлагьана акъатнач. Къастунал кIевивили, дерин чирвилери, духтурвилин пешедал рикI хьуни адаз куьмекна.
— Духтурар Алиметоврин тухумда са шумуд кас ава, зи дахни духтур я, — лугьузва Карина Альбертовнади. — Пеше хкягъуниз заз и кардини еке таъсир авуна.
К.Алиметовади 2001-йисуз Дагъустандин государстводин медицинадин академиядин “Лечебное дело” факультет лап хъсан къиметар аваз акьалтIарна. 2001-2003-йисара ада ДГМА-дин эндокринологиядин кафедрадин клинический ординатурада (умуми эндокринологиядин пешедай) кIелунар давамарна. 2003-йисуз Даггосмедакадемияда духтур-эндокринологвилин сертификат къачуна. Гьа и йисуз ам Дагъустандин диагностический центрадиз эндокринолог яз кIвалахал кьабулна.
К.Алиметова гьеле ДГМА-да кIелдай йисарилай илимдин кIвалахдал машгъул жезвай. Академиядин 65 йис тамам хьуниз талукьарна Махачкъалада тухвай студентрин ва жегьил алимрин илимрин 55 лагьай конференциядин докладрин тезисрин кIватIалда адан (“Некоторые морфологические изменения в надпочечниках спинальных животных” ва “Цитомегаловирусная инфекция у беременных г. Махачкалы”) илимдин макъалаяр гьатна.
2007-йисуз Каринадикай Вирироссиядин тиреидологический IV конгрессдин иштиракчи хьана. 2008-йисуз (гуьгъуьнлай 2013-йисузни) Москвада Россиядин дипломдилай гуьгъуьнин образованидин медицинадин академияда эндокринный хирургиядин терефни галаз эндокринологиядай пешекарвилин дережа хкаждай курсара хьана. Гьа йисалай К.Алиметовадикай, ДГМА-дин аспирантурада заочнидаказ кIелни ийиз, эндокринологиядин кафедрадин ассистент хьана.
2009-йисуз К.Алиметовади Кисловодск шегьерда диабетдиз талукь хци месэлайрай конференцияда иштиракна, махсус диплом къачуна. Тезисрин кIватIалдиз адан (“Мониторинг йододефицита в Республике Дагестан на фоне его профилактики”) илимдин макъала акъатна.
2010-йисуз РД-дин здравоохраненидин министерстводин аттестационный комиссиядин къарардалди Карина Альбертовнадиз “Эндокринология” пешедай сад лагьай пешекарвилин категория гана.
2011-йисуз ам Москвада Россиядин медицинадин илимрин академиядин Эндокринологиядин Илимрин Центрадин бинедаллаз нейроэндокринологиядай кIелунин курсара хьана.
Са йисалай ам Дагъустандиз хтана, медицинадин рекьяй вич машгъул жезвай хилерай са бязи месэлаяр тайин авун (ренальная экскреция йода, частоты зоба) патал дагъдин, дагъдин ценерив гвай ва дуьзендин районрай материал кIватIна. Мадни ада Махачкъалада, гьакIни вичи гуьзчивалзавай районра аялрик зобдин азар кватIа ахтармишна.
Гуьгъуьнлай Каринади Сеченован медуниверситетда ва НИИ-да диетологиядай чирвилерин дережани хкаж хъувуна.
КьетIен алакьунрин ва бажарагъдин сагьиб тир баркаллу руша 2017-йисуз (“Клинико-эпидемиологическая характеристика и профилактика эндемического зоба и йододефицитных состояний в Республике Дагестан” темадай) агалкьунралди диссертация хвена, медицинадин илимрин кандидатвилин тIвар къачуна.
Вири дуьньяда коронавирусдин азар чкIанвай вахтунда К.Алиметовадин къайгъуяр мадни артух хьана. Ада цIудралди инсанар и хаталу азардикай хвена, и рекье ада галатун тийижиз зегьмет чIугвазва. Идай чи баркаллу районэгьли Дагъустандин диагностический центрадин кьилин духтур З.А.Каплановадин къул алай Гьуьрметдин грамотадиз лайихлу хьана.
Хайи райондин, Лезгистандин тIвар хкажзавай вахъ кIвалахда ва илимдин рекье мадни еке агалкьунар хьурай, гьуьрметлу Карина Альбертовна!
Асият Мирзалиева,
Хазран Кьасумов
