Гьич са касни, гьич са затIни рикIелай алудзавач
Ватандин ЧIехи дяведа Гъалибвал миллионралди советрин халкьарин чанаралди къазанмишнавайди къе садазни сир туш. Къати женгера чпин чанар гайибур, немсерин фашистрин концлагерра, гужар авуна, кайибур, дяведа гел галачиз квахьайбур са чIавузни чи рикIелай алатдач. Абур эбеди яз рикIел хуьнин мураддалди шегьерра ва хуьрера гуьмбетар хкажзава, анрал акьалтзавай несил бубайрин баркаллу крариз вафалубур, ватанпересар яз тербияламишунин мураддалди жуьреба-жуьре мярекатар кьиле тухузва, гел галачиз квахьай аскеррин тIварар, стхавилин сурар жагъурзава.
Эхиримжи йисара чи хуьрерани дяведа телеф хьайибурун тIварар жагъурунин, абуруз шартIунин сур-гуьмбетар хкажунин, абурухъ гелкъуьнин баркаллу кIвалахар кьиле тухун анжах тебрик ийиз жеда. Ихьтин баркаллу крарин сагьибрикай сад тир МВД-дин ва зегьметдин ветеран Шагьпазов Шихкерим Азимовичакай куьруь суьгьбет ийиз кIанзава.
Вичин бине Сулейман-Стальский райондай тир Шихкерим Шагьпазова гзаф йисара анин РОВД-да кадрийрихъ галаз кIвалах тухунин рекьяй отделдин начальникдин заместитель яз, гуьгъуьнин йисара Мегьарамдхуьруьн райондин ОВД-да кIвалахна.
Хайи хуьруьн тарих чирунал рикI алай ветеранди са йисан вахтунда Мегьарамдхуьруьн, Сулейман-Стальский районрай вичин хуьруьнвийрикай, дяведин иштиракчийрикай делилар жагъурна. ИкI, анай дяведа 156 касди иштиракна: 76 касдиз элкъвена хуьруьз хтун кьисмет хьанач, абур дяведа телеф хьана, 23 кас гел галачиз квахьна, фронтдай анжах 57 кас хайи хуьруьз хтана.
Хайи халкьдин гележегдихъ рикI кузвай ватанпересди дяведа телеф хьайи ва гел галачиз квахьай вичин хуьруьнвийриз Мегьарамдхуьруьн райондин Хъартас-Къазмайрал вирибурун тIварар кхьенвай мемориальный доска-стела эцигун кьетIна. И карда адаз вафалу дустарни жагъана. Абурни адан хуьруьнвияр — МВД-дин отставкада авай подполковник Саидалиев Шагьвелед Шагьэмирович ва полковник Агьадулаев Жарулагь Рамазанович я. Абуру куьруь са вахтунда, маса гуьгьуьллу ксарин куьмекарни галаз, и хуьре аквадай чкадал аскерриз-хуьруьнвийриз стела туькIуьрна. Им, гьелбетда, ЧIехи Гъалибвилин суварин вилик баркаллу кIвалах хьана.
Ватандин ЧIехи дяве башламиш хьайи чIулав йикъан вилик Сулейман-Стальский РОВД-дин ветеранрин советдин председатель Фамил Жамалдинова гзаф йисарин намуслу зегьметдай ва лайихлувилерай МВД-дин ва зегьметдин ветеран, отставкада авай подполковник Шагьпазов Шихкеримав “МВД-дин 100 йис” юбилейдин медаль шад гьалара вахкана. Лугьудайвал, баркаллу кардиз — лайихлу къиметни. Гьелбетда, им полициядин жегьил работникар патал хъсан чешне жезва.
Абидин Камилов
