Алай йисан 23-сентябрдиз “Самур” газетдин редакциядин коллективди Бакуда “Россотрудничество”-дихъ галаз санал лезги эдебиятдин классик Алибег Фатахован 110 йисан юбилей къейдна. ТIугъвалдин шартIарив кьадайвал, мярекат “Россотрудничество”-дин дараматда тIимил инсанрин иштираквал аваз кьиле тухвана.
Мярекат Урусатдин Бакуда авай малуматринни медениятдин центрадин чирвилериз талукь программайрин координатор Любовь Якунинади ачухна. Ада Алибег Фатахов Советрин эдебиятдин машгьур векилрикай тирди, чи классикди А.С.Пушкинан, М.Ю.Лермонтован, В.В.Маяковскийдин ва маса шаиррин шиирар, урус чIалай лезги чIалаз элкъуьрна, кIелдайбурув агакьарнавайди, гьа идалди чи халкьарин арада дуствилин ва эдебиятдин алакъаяр мягькемарунин кардик чIехи пай кутунвайди кьилди къейдна. Ахпа ада “Самур” газетдин кьилин редактор Седакъет Керимовадиз гаф гана.
Алибег Фатахован уьмуьрдинни яратмишунрин рекьикай рахай С.Керимовади кIелдайбурун гегьенш къатариз тийижир са кьадар делилар раижна, шаирдиз девирдин чIулав къуватри датIана басрухар гайиди, адакай гзаф делилар къедалди винел акъуднавачирди, чIалан устаддин уьмуьрдин рехъ ва яратмишунар генани мукьуфдивди чирна кIанзавайди важиблу тирдакай лагьана.
“Самур” газетдин кьилин редактордин заместитель Муьзеффер Меликмамедова Алибег Фатаховакай урус ва лезги алимрини шаирри лагьанвай гафар рикIел хкана, адан журналиствилин ирсинай мисалар гъана. Ада къейд авурвал, Алибег Фатахован хкягъай чIалар кьилдин ктабар яз акъудунин карда гзаф зегьметар чIугур чи машгьур писатель, журналист Назир Агьмедова кхьенай: “Алибег Фатахов садавни гекъигиз тежедай поэзиядин дагъ я. Дуьньядин эдебиятда ихьтин жаван ва кьакьан дагълар тIимил ава”.
“Самур” газетдай
