Республикадин аялрин ревмокардиологиядин «Ахты» санаторий РД-да и жуьредин лап хъсанди яз гьисабзава. Ахцегь вацIун кудай дарман ятарин чешмейрал — гуьнедик гьуьлуьн дережадилай 1100 метрдин кьакьанда экIя хьанвай ада 1,46 гектардин майдан кьунва. Аялар сагъарун патал ина чими ва кудай дарман ятарилай (сероводород, кремневый кислота квай и ятар гидрокарбонатно-хлоридно-натриевыйбурук акатзава) алава дагълух гуьзел тIебиатдин, михьи гьавадинни ятарин, кфетлу тIуьнрин, идарадин къенепатан низам-къайдадин шартIарни важиблу я. Амма кьилинди, гьелбетда, ина — тIебиатдин халис дарманханада — аялрин къуллугъда тежрибалу ва къайгъудар медперсонал акъвазнава. Санаторий кьуьд-гад кардик ква. Духтуррин теклифдин ва Минздравдин пулсуз путёвкайрин бинедаллаз иниз талукь тир азарар кваз 5-17 йисарин аялар кьабулзава.
Тежрибалу кьилин духтур, курортологиядин илимдин институтдин пешекар Жамиля Загьировна Зейналовадин регьбервилик кваз «Ахты» санаторийда аялдин чIехи жезвай бедендин тIебии мумкинвилер ачухарун патал дарманрилайни артух чкадин дармандин цикайни кьарадикай ва дагъдин кьетIен тIебиатдин надир шартIарикай хъсан менфят къачузва. Нетижада гъвечIи пациентрин кпулрин, рикIинни дамаррин къурулушдин ва са жерге маса азарар саки кьве гьафтедин вахтунда нетижалудаказ сагъардай мумкинвал жезва.
— Гафаралди ваъ, жуван вилералди акуналди куьн хъсан гъавурда акьада, «Ахты» санаторийдин шартIар Россиядин ва дуьньядин машгьур санаторийринбурулай са куьналдини усал туш. Эхиримжи йисара РД-дин здравоохраненидин министерстводи чун медицинадин алай аямдин истемишунрив кьур багьа тадаракралди таъминарнава, — лугьузва Жамиля Зейналовади. Вичин куьмекчи, идарадин кьилин медсестра Лейла Бабаевадихъ галаз чаз, зазни райондин образованидин Управленидин начальник Халидин Эльдароваз, вири кабинетар къалуриз, тамам экскурсия тешкилна. Малум хьайивал, инаг санлай 15 миллион манатдин къимет авай медтехникадалди тадаракламишнава…
Аялрихъ (республикадин районрайни шегьеррай атанвай абур 32 кас авай, койка-чкаяр — 50 ава) ва абурал кьил чIугваз атанвай бязи диде-бубайрихъ галазни суьгьбетарна, абур пара рази тир. Жедачни бес, диетолог-духтурдин гуьзчивилик кваз аялриз суткада 5 сеферда хъсан тIуьнар гузва; сагъардай физупражненияр, экскурсияр, рикI аладардай гьар жуьре къугъунар ийиз тазва ва икI мад. ТIебиатдин къулай мумкинвилерилай гъейри, сагъардай махсус серенжемрикай духтурри (медицинадин чIалалди лагьайтIа, водолечение, гелиотерапия, пелоидотерапия, терренкур, физиотерапия, гъилин массаж, ЛФК, эрготерапия, арттерапия, литотерапия) гегьеншдаказ менфят къачузва.
Медицинадин къуллугъчийрин йикъан вилик (цIи ам 16-июндиз къейдна) республикадин аялрин «Ахты» санаторийдин цуькведи кьунвай гьаятда пешекарвилин сувариз талукь шадвилин мярекат кьиле фена. Ам, санаторийдин коллектив, аялар ва мугьманар тебрикунин гаф рахуналди, гьакI санаторийдин гьар йикъан кIвалахдикай, духтуррин гьакъисагъ зегьметдикай, вилик акъвазнавай месэлайрикай суьгьбет авуналди, Жамиля Зейналовади ачухна.
— «Духтурвилин, иллаки аялрин духтурвилин, пеше акьван важиблуди ва герекди я хьи, и хиле дуьшуьшдин ксари яргъалди дурум гудач. Разивилелди лугьун, чи коллективда жавабдар, михьи, Гиппократан кьинез вафалу вини дережадин пешекарри кIвалахзава, — къейдна ада.
«Ахты» санаторийдин коллективдиз пешекарвилин сувар Ахцегь РУО-дин начальник, филологиядин илимрин кандидат Халидин Эльдарова, и цIарарин авторди, Ахцегьрин ООШ-дин директор Мейрам Рамазановади, Москвадин са клиникада кIвалахзавай духтур Жаннет Зейналовади, идарадин профсоюздин комитетдин председатель Заира Гьажиевади ва масабуруни тебрикна.
Жамиля Зейналовади РД-дин здравоохраненидин министерстводин ва идарадин профкомдин патай кьилин медсестра Лейла Бабаевадив, чпин къуллугъдин везифаяр намуслувилелди тамамарзавай жергедин медсестрайрив — Анелия Насировадив, Фатима Муртузалиевадив, Замина Магьмудовадив, Таисия Ибрагьимовадив, Гуьлмейрам Рамазановадив, Келимат Ханагьмедовадив, Глевша Азизагъаевадив, Эльвина Идрисовадив, гьакI санитаркаяр тир Динара Моллаевадив, Наиля Гьажиевадив, Ульзана Сулеймановадив, Зуьгьре Ханагьмедовадив, Наида Ламазовадив гьуьрметдин грамотаярни цуьквер вахкана.
Мярекат аялрин манийринни кьуьлерин нумрайралди ва суварин тIуьн-хъунралди давам хьана.
Дашдемир Шерифалиев
