Дагъустандин здравоохраненидин министерстводин делилрал асаслу яз, коронавирусдин тIугъвалдин девирда чи республикада 10 агъзурдалай виниз аялар азарлу хьана. Эгер сифте вахтара ковиддин госпиталра къаткурна сагъарзавай аялрин кьадар тIимил тиртIа, къенин юкъуз гьалар дегиш хьанва.
Статистикадин делилри шагьидвалзавайвал, ихьтин дуьшуьшар мукьвал-мукьвал гьалтзава, гзаф аяларни азарлу жезва. Идалайни гъейри, азарлу жезвай аялрин гьаларни къвердавай чIурубуруз элкъвезва, гзаф дуьшуьшра азарди абуруз тади гузва. Аялри санал яшамиш жезвай багърияр, чIехибурулай тафаватлу яз 1,5 сеферда гзаф начагъарзава…
Къенин юкъуз аялрик COVID-19 квайди лабораторияда тестикь хьанвай 8,7 агъзур дуьшуьш дуьздал акъуднава. Гзафни-гзаф мектебра кIелзавай яшда (7-далай 17 йисалди) авай аялар азарлу жезва, ихьтин дуьшуьшри 67 % тешкилзава. Абурукайни 33 % дуьшуьшра 6 йисал къведалди яшда авай аялар я.
Коронавирусдикай сагъ хъхьайдалай кьулухъ кьиле тухудай махсус, тайин хьанвай жуьредин са къайда гьам аялар, гьамни чIехибур сагъарун патал авач. Аялар патал виридайни кьилинди яз ахварин режим къайдадик кутун, яни лазим кьадар вахтунда ахвар авун, тIуьнин кфетлувилиз фикир гун, лазим витаминар ишлемишун меслятзава. Медикаментрин куьмекдалди сагъарун и кар патал лазимвал авайла кьилиз акъудзава.
Гьайиф хьи, тIугъвалдин девирда чпик коронавирус квайди лабораториядин диагноздалди тестикь хьанвай 20 аял, сагъардай лазим вири серенжемар кьабулнатIани, духтурривай къутармишиз хьанач, абурун чIехи пай 2 йисал къведалди яшда авайбур тир.
Къенин юкъуз Дагъустандин ковиддин госпиталра вирус квай 32 аял сагъарзава.
РикIел хкин: алатай йисан ноябрдин эхирра РФ-дин здравоохраненидин министерстводи аялар патал “Спутник М” (“Гам-КОВИД-Вак М”) вакцина регистрация авуна. Алай йисуз ам аялриз ягъунин кампания кьиле тухуда. Н.Ф.Гамалеян тIварунихъ галай эпидемиологиядин ва микробиологиядин рекьяй ахтармишунар кьиле тухудай Милли центрадин регьбер Александр Гинцбурган гафаралди, им гьарда вичин хушуналди кьилиз акъудзавай серенжем я. Азардиз акси вакцина 2022-йисан эхирра аялриз нерин хилериз ядай (назальный) жуьрединдакайни менфят къачудай мумкинвал жеда.
«Лезги газет»
