Вирироссиядин общественный “Россиядин дидеяр” гьерекатдин Махачкъалада авай векилханади РД-дин образованидин ва илимдин министерстводин куьмекдалди мергьяматлувилин “Аялар мектебриз гьазурин” серенжем малумарнава.
РД-дин образованидин ва илимдин министерстводи хабар гузвайвал, серенжемдин асул макьсад дуланажагъ хъсанзавачир хизанрин месэлайрал жемиятдин фикир желб авуникай, мектебриз физвай, гьа са вахтунда яшайишдин жигьетдай четин гьалда авай аялриз куьмек гуникай ибарат я.
“Дагъустандин 2 агъзурдалай гзаф етимриз ва акьалтIай кесиб гьалда авай хизанрай тир аялриз куь куьмек герек я. Серенжемди абур патал парталар, кIвачин къапар, чантаяр ва мектебда кIелун патал лазим маса затIар кIватIдай мумкинвал гуда. Куьмек гунин къайдаяр гьар жуьрединбур я: туьквендай шей къачунин сертификат, пул гайитIа ва я парталар, канцтоварар маса къачуртIа жеда”, — лугьузва малуматда.
Мергьяматлувилин серенжем 15-июлдилай 31-августдалди давам жеда. Адан гьакъиндай тамам делилар чирун ва я и карда иштиракун патал я 89634225789 нумрадиз зенг авуртIа, я тахьайтIа sofa210580@mail.ru адресдиз Махачкъалада авай “Россиядин дидеяр” ВОД-дин председатель Сефижат Мегьамедагъаевна Мегьамедрасуловадин тIварцIел чар кхьейтIа жеда.
«Лезги газет»
