Алай йисуз “Лезги газет” кхьенвайбурун кьадар акурла, гуьгьуьл чIур жезва. Зи фикирдалди, 7380 экземпляр лезги районриз, хуьрериз, лезгияр яшамиш жезвай шегьерриз лезгийрин чпин кьадардиз килигайла лап тIимил я. Бязибуру лугьузва, ада чаз вуч гузва, ам гишин руфунни кьецIил тан яни? Дуьз фикир авуртIа, ам гишин руфунни я, кьецIил танни. Гьакъикъат хийирлу шей я. Ам Лезгистандин мулкарай авахьзавай Самур вацI, чи чилин наз-нямет я. Эгер чна а булахар, Самур вацI кьурадай гьалдиз гъайитIа, лезги чилин наз-нямет дадмиш тавуртIа, чна фикирна кIанда гележегда чи гьал гьихьтинди жедатIа. Чна вирида, гаф сад авуна, “Лезги газетдин” тираж са шумуд сеферда артухарна кIанда.
Газетдин чинра цIийиз чапзавай рубрикайри гун чаз чин тийизвай, хабар авачир делилрихъ галаз танишарзава. “Лезги хуьрер”, “Квез чидани?”, “Итижлу делилар” рубрикайрик кваз фикир желбдай малуматарни делилар гузва. Чаз чин тийизвай чи лезги хуьрерикай, архиврикай хабар жезва. Бес им пис кIвалах яни?!
Заз лезги районрай газетдихъ галаз алакъа хуьзвай чи лезги ватанпересриз газетдин чинлай сагърай лугьуз кIанзава ва алакъа авайдалайни мягькемаруниз эвер гузва. Заз бязибурун тIварарни кьаз кIанзава: Куругъли Къалажухви, Хазран Кьасумов, Дашдемир Шерифалиев, Нариман Къарибов, Шагьабудин Шабатов, Райсудин Набиев, Азедин Эсетов, Рагьидин Эминов, Ишреф Жаватов, Сардар Абил ва гзаф масабур.
Гьуьрметлу “Лезги газетдин” редакция! Къуй квехъ, куь коллективдихъ, мадни еке агалкьунар, газет кхьидайбурун кьадарни артух хьурай! 2019-йисуз газетдин тираж артух жедайдак за еке умудар кутазва.
Шихали Багъиров
