“2014-2017-йисара ва 2020-йисан девирдалди  хуьрерин  мулкар дурумлудаказ вилик тухун” тIвар  ганвай махсус программадал асаслу яз, Сулейман-Стальский райондин Асалдхуьруьз газ гъана. 10-декабрдиз хуьр газдик кутунин  шадвилин мярекат кьиле фена.

Асалдхуьр райондин центрадивай кьибледихъ 5 километрдин мензилда ава. Хуьре яшайишдин кIвалерин кьадар 59-дав агакьнава, ина 318 кас агьалияр яшамиш жезва.

Хуьр газдалди таъминарунин месэла хцибурукай сад тир. Гьеле 2012-йисуз ина 4,78 километрдин мензилдиз сметада къалурнавай вичин къимет 4 миллионни 611,5 агъзур ма­натдиз барабар тир газопровод тухунин кIва­лахар гъиле кьунай. 2012-йисалай 2013-йисалди Асалдхуьруьз газ тухунал РД-дин “Спецгазстройсервис” КП, 2014-йисалай лагьайтIа, РД-дин “Дагсельхозстрой” ГКУ маш­гъул хьана. 2014-йисалди газопровод хуьруьз агакьна ва 40 процентдилай виниз куьчейрай газдин турбаяр тухвана. Гуьгъуьнин вад йисуз и объ­ектдал кIвалахар акъваз­ хьана. Хуьруьн агьалийри ва райондин вилик-кьилик квай ксари республикадин дережадин къурулушриз, ведомствойриз гзаф сеферра ар­за-ферзе авурдалай гуьгъуьниз, “2014-2017-йисара ва 2020-йисан девирдалди хуьрерин мулкар дурумлудаказ вилик ту­хун” тIвар ганвай федеральный махсус программадал асаслу яз, Асалдхуьруьз газ­ тухунин кIва­лахар гъиле хкьуна. КIва­ле­­риз газдин турбаяр тухунин кIвала­хар куьтягьнава.

Фадлай вил алаз хьайи газ хуьруьв  агакьун чкадин агьалийриз мубарак авун патал Асалдхуьруьз Дагъустан Республикадин Гьукуматдин Председателдин заместитель Владимир Лемешко, райондин кьил Нариман Абдулмуталибов, Дагъустан Республикадин хуьруьн майишатдин ва суьрсетдин министрдин сад лагьай заместитель Адилхан Ганакаев, “Самурское” управленидин начальник Сергей Хаметов, пудратдин организациядин векилар, райадминистрациядин къурулушдик акатзавай идарайрин руководителар, общественностдин ва СМИ-рин векилар атана. Мярекатда иштиракзавайбур Нариман Абдулмуталибова тебрикна. Ада хуьруьн агьалияр патал и вакъиадихъ гьихьтин метлеб аватIа къейдна.

“Къе чи районда нубатдин сувар кьиле­ тухузва — Асалдхуьр тамамвилелди газдалди таъминарнава. Асалдхуьруьнвийрин вил и кардал фадлай алайди тир. Хуьруьз газ гъу­нин кIвалахар гзаф яргъал­ фена.  Анжах цIинин йисуз Дагъустан Рес­публикадин Кьил Владимир Василье­ва куьмек гунин нетижада хуьруьн агьалияр чпин эрзиман мураддив агакьна. Газ гъуни­ Асалдхуьр, Гуьне патан хуьрер, санлай ви­­ри район патал алава мумкинвилер ачухда. Газдик кутуни яшайишдин хейлин месэлаяр гьялдай, хуьруьн агьалийрин дуланажагъ къулайди ийидай мумкинвал гуда. Асалдхуьруьнвийрин гьар са кIвализ чимивал ва къулайвал атунай заз райондин руководстводин, гьакIни вири агьалийрин тIварунихъай республикадин Кьил Владимир Васильеваз сагърай лугьуз кIанзава”, — къейдна Н.Абдулмуталибова.

КIватI хьанвайбурун вилик тебрикдин келимаяр РД-дин Гьукуматдин Председателдин заместитель Владимир Лемешкони рахана. Ада къейд авурвал, республикадин руководстводи  эцигунрин кIвалахар яргъал фенвай имаратар ишлемишиз вахкуниз, гьа гьисабдай хуьрериз газ тухунин месэлайриз кьетIен фикир гузва.

“Хуьр газдик кутун адан агьалияр патал­ лишанлу вакъиа я. Им чи виридан умуми­ гъалибвал я. ГъвечIи хуьрер газдик кутуни  неинки агьалийрин яшайишдин шартIар хъсанарзава, гьакIни хуьрерин чкаяр вилик­ тухун патал цIийи мумкинвилер ачухзава. Зун инанмиш тирвал, Асалдхуьруьхъ еке гележег ава. За квез и лишанлу вакъиа мубаракзава ва район гележегда мадни абад хьун алхишзава”, —  къейдна ада.

Владимир Лемешкоди агьалийриз, яшайишда газ ишлемишдайла, хатасузвилин къайдайрал амал авуниз эвер гана.

Мярекатдал Адилхан Ганакаевни ра­хана. Асалдхуьруьн агьалийрин тIва­ру­нихъай педагогвилин зегьметдин ветеран Къагьриман Амаханова и важиблу проект уьмуьрдиз кечирмишунин карда  иштирак авурбуруз разивилин келимаяр лагьана. Ада РД-дин руководстводин векилривай республикадин метлеб авай “Кьасумхуьр-Зугьрабахуьр” рекье къир цунни тIалабна.

Ахпа виридалайни гзаф вил алаз хьайи кардив — хуьр шадвилин гьалара газ­дик кутунин ва лишанлу чирагъ куькIуь­рунив эгечIна. Чирагъ куькIуьрдай их­тияр, кIватI хьанвайбуру гурлу капар ягъу­никди, Нариман Абдулмуталибоваз, Владимир Лемешкодиз, Адилхан Ганакаеваз, Къагь­риман Амахановаз ва аялриз гана.

Гуьгъуьнлай мугьманар хуьруьн агьалийрихъ галаз гуьруьшмиш хьана. Мяре­катда иштиракзавай ксар Къиясудин Нисредован кIвализ фена. КIвалин кайваниди  газ ишлемишуни гьихьтин къулайвилер гузватIа, гьа кардал гъиле-гъил аваз къимет эцигна, атанвай мугьманриз лезги хинкIар теклифна.

Йисан эхирралди  Агъа Хъартасрин ва Вини Хъартасрин хуьрерни газдик кутадайвал я. Гележегда кьвед-пуд йисан муддатда райондин амай вири хуьрерни газдалди таъминарда.

«Лезги газет»