Алай вахтунда игитар гуя амайди туш, абурун вахтар фена лугьудай ванер къведа. Алай вахт пулдиз, къуватдиз икрамзавайди, чалкечирвилиз, ахлакьсузвилиз, марифатсузвилиз рекьер ачухзавайди я лугьуда. Са бязи инсанарни, СМИ-ярни алай вахтунин инсанрик жуьрэтлувилин, викIегьвилин, къенивилин ерияр кумачирвилихъ инанмишариз алахъзава. Гьелбетда, икI фикирзавайбур гьахъ туш.
Аллагьдиз шукур, чи йикъарани чи арайра намуслу, викIегь, дирибаш инсанар яшамиш жезва, гьамиша женни ийида. Ахьтинбурув агакьдай пишкешарни чIехибур жеда. Къейд авун лазим я хьи, алай хьтин вахтунда къени крар ийизвай, къвалав гвайбуруз куьмек гузвай инсанрин къимет мадни артух жеда. Гьахьтин хва тир Россиядин Федерациядин Игит рагьметлу Зейнудин Батманов. Кьурагь районда тамарихъ гелкъвезвай мешебеги, террористрин хурук акатай кас. Адакай гзафбуруз чир хьана, ван хьана. ГьикI лагьайтIа, и викIегь, къени, дугъри итимдикай гьам республикадин, гьам федеральный СМИ-ри гзаф кхьена. Заз лагьайтIа, къе адахъ галаз таниш хьайивал рикIел хкиз кIанзава.
2000-йисан сифте кьилер тир. Дагъустандин муфтиятди зун Кьурагь райондин мискIинда имамвал ийиз рекье тунвай. Са сеферда зи патав рикIиз хуш, чина, вилера шадвал авай итим атана. Чна жуьреба-жуьре месэлайрикай суьгьбетарна. Зун ахьтин фикирдал атана хьи, гуя чун чаз чиз гзаф вахт я. Амма Зейнудин Батманов заз сад лагьай сеферда аквазвай. Чи арада стхавилин алакъаяр хьана.
2013-йисуз Аллагьди чаз кьведазни санал гьаждал фидай мумкинвал гана. И кардал ам гзаф шад тир. Чкадал агакьдалди ада чаз вич иман гвай халис динэгьли хьиз къалурна. Рекье авай юлдашризни ада вичин къенивилелди, мили хъуьруьналди къуватар гудай.
Зейнудин Батманов маса касдин дердиникай хабар кьадай инсан тир. Са сеферда Кьурагьа гьалтайла, ада заз лагьана: “Шамил стха, заз чизва, ваз хъуьтIуьз кудай кIарасар герек я. Хизанда гъвечIи аялар ава. За ваз кIарасар гьазурда, ахпа абур хутахиз ша”.
Гьелбетда, за адаз сагърай лагьана, амма жуван дерди патал заз мешебеги артухан къайгъуйрик кутаз кIан хьанач. Ада маса инсанрив гвазни зав хабар ахгакьарна, амма завай хьанач. Гуьгъуьнин йисуз ада вичи и месэла гьялна. Нянихъ кIвализ хтай заз гьаятдин вилик кIарасрин хара кваз акуна. Зани фикирна: къуншидинбур я. Ахпа чир хьайивал, абур Зейнудин стхадин патай зи хизандиз авунвай пишкеш тир. Зун текъведайди чир хьайила, ада вичи машин, инсанар жагъурна, кIарасар рекье тунай.
Пуд лагьай йисуз, Зейнудинан къилих чир хьайи зун адан патав машин ва инсанар галаз фена. Заз чизвай, са машинда авай кIарасар гьазурун гьикьван четин кIвалах ятIа. Зейнудин, вичел акьалтзавай четинвилеризни килиг тавуна, масадбурун куьмекдиз фидай инсан тир.
Тама террористар гьалтай юкъузни, 2015-йисан 15-майдиз, ада вичин итимвал, къилихдин хъсан ерияр тестикь хъувуна. Бандитрин гъиляй са тахсирни квачир хизан ахкъудна, вичин чан къурбандна. Зейнудин Батманов гьикI яшамиш жезвайтIа, гьакI телефни хьана. Масабур къутармишуналди. Ам халис Игит я. Мугьаммад Пайгъамбардин гьадисрикай сада лагьанва: “Инсан гьикI яшамиш хьанатIа, гьакI рекьида ва гьикI кьенатIа, гьакI адал чанни хкведа”.
Обществоди Игитдин кардиз еке къимет ганва. Адан кIвачихъ КIирийрин хуьруьн школа янава. Акьалтзавай несилдиз адалай чешне къачун патал суьгьбетарзава.
Чнани Сад тир Аллагьдивай адаз вичин патай лап еке пишкеш гун — сура женнетдин нур жедайвал авун тIалабзава. Амин.
Шамил гьажи Омаров
