Чи ватанэгьлияр — гьар сана
Несиб гьихьтинди жедатIа, ада инсан гьиниз акъуддатIа, садазни виликамаз чир жедач. Жуьреба-жуьре себебар аваз, кьисметди маса шегьерриз, республикайриз, уьлквейриз акъуднавай лезгийрин кьадарни тIимил туш.
Къенин зи ихтилат мукьвара Албаниядиз куьч хьанвай ва ана духтурвалзавай Сакинат Мурадовна Омаровадикай я. Ам 1975-йисуз Махачкъалада дидедиз хьана. 1992-йисуз ада, ингилис чIални чируналди, шегьердин мектеб куьтягьна.
Духтуррин хизанда хьайи Сакинатаз вичикайни духтур жедайди гьеле аялзамаз аян тир. Адан рагьметлу буба (кьепIирви) Мурад Омарова, медицинадин илимрин кандидатди, гзаф йисара Дагъустандин медицинадин университетдин хирургиядин азаррин кафедрадин доцентвиле, гьакI хирургвилени кIвалахна. Диде Фатима Гьасановна Алкадарская (кьасумхуьруьнви) духтур-офтальмолог, хирург я, ада республикадин офтальмологический азарханада гзаф йисара кIвалахна. Алай вахтунда республикадин меркездин медицинадин хсуси центрада кIвалахзава. Сакинатан вах Зарифади Дагъустандин педагогикадин институт тафаватлудаказ, гъвечIи вах Жавизата Дагъустандин медицинадин академиядин стоматологиядин факультет куьтягьна.
ДМА-дин 4-курсуна кIелдай чIавуз Сакината вичин дидедин регьбервилик кваз офтальмология чириз алахъна. Гележегдин духтурди вичин азад вахт инсанрин сагъламвал ахтармишунин къайдаяр чирун ва и рекьяй тежриба кIватIун патал азарханайра акъуддай.
Институт куьтягьай вахтунда Сакината гъвечIи руш Лейла чIехи ийизвай. Москвада Гельм-гольцан тIварунихъ галай илимдинни ахтармишунардай институтда офтальмологиядин рекьяй ординатурада кIелдай чIавуз хтулдихъ гелкъуьн диде-бубайри чпин хивез къачуна. С.Омаровади 2001-йисуз ординатура агалкьунралди куьтягьна.
Вичиз хъсан чирвилер гайи муаллимрин — Валентина Тюринадин, Елена Абрамянан, Нина Зайцевадин, Софья Пастернакан тIварар пешекарди хушвилелди рикIел хкизва.
2009-йисуз ада Гельмгольцан тIварунихъ галай вилерин азаррин МНИИ-дин офтальмоонкологиядин отделенида медицинадин илимрин доктор В. Вальскийдин регьбервилик кваз агалкьунралди кандидатвилин диссертация хвена.
Пешедин рекьяй зегьметдин рехъ Сакината 2001-йисалай РФ-дин оборонадин министерстводин 574-нумрадин военный клинический госпиталда кIвалахунилай башламишна. Ина, духтур-офтальмолог яз, 2008-йисал кьван кIвалахуни адан чирвилер тежрибадин рекьяйни мягькем хьана. 2009-йисалай 2019-йисан октябрдалди ада Москвада Иноземцеван тIварунихъ галай клинический азарханада кIвалахна.
Адан руш Лейлади Россиядин университетда (Москва) юриствилин пешедай кIелна, кIвалахиз Дагъустандиз хтана. Къецепатан уьлквейра тежриба къачунин макьсаддалди Сакинат Омаровади алай йисан октябрдин вацралай Албаниядин кьилин шегьердин офтальмологиядин клиникада вичин пешедин рекьяй кIвалах давамарзава. Ина гьелелиг адаз са йисан вахтунда кIвалахун теклифнава.
Тирана шегьердикай духтурди гьейранвилелди ихтилатзава. Адан фикирдалди, ам Махачкъаладиз гзаф ухшар я. Идалайни гъейри, ана килигуниз лайих тир затIар, чкаяр, музеяр, къадим имаратар гзаф ава.
— Чкадин агьалияр мегьрибанвилелди рафтарвалдайбур, рикI ачухбур я. Заз и уьлкве хуш хьанва, яваш-яваш чIални чирзава. Ина гьикьван чIавалди амукьдатIа лугьуз жедач, амма клиникада кIвалахунихъ галаз сад хьиз, къецепатан уьлкведа яшамиш жедай мумкинвални хьунал за шадвалзава, — лугьузва Сакинат Мурадовнади.
Гьина аватIани, къуй чи ватанэгьлийрихъ чандин сагъвал ва агалкьунар хьурай!
К.Ферзалиев
