И ва я маса хуьруьн мулкар зирзибилрикай хуьнин месэла неинки администрациядин кьилин, гьакl ватанда абадвални михьивал хьана кlанзавай гьар са агьалидин гуьзчивиликни хьун лазим я. Хуьрерин зирзибилар гадарун патал Докъузпара районда махсус чка фадлай кардик ква. А чка, малум тирвал, Докъузпара райондин къерехда, инсанар яшамиш тежезвай чуьлдин сергьятра ава.

Гьар са хуьре кlватl жезвай зирзибилар тайин вахтунда пар чlугвадай махсус улакьра аваз а чкадиз тухузва. Къейдна кlанда хьи, хуьрера и крарал машгъул жезвай ксарни тайинарнава.

Мумкинвилер арадал гъанватlани, бязи дуьшуьшра чун зирзибилар гадарнавай гьамбаррал дуьшуьш жезва.  Икl, и йикъара зун Миграгъ-Къазмайрал яшамиш жезвай Жамал Камаловахъ галаз «Миграгъ-Къаракуьре» къаналдин сив селди тухванвай чкадал фенай. Миграгъ-Къазмайрин мулкарик акатзавай, тlвар кьунвай дигидий цин къаналдин сивин патав гвай чкадал чаз цlийиз арадал атанвай зирзибилрин гьамбар акуна. Тlебиат кьацlур тавунин, жув авай чка михьидаказ хуьнин месэлайриз талукь тирвал фикир тагузвайвиляй ихьтин чlуру крар арадал къвезва.

Хуьрерин администрациядин кьиле авай ксарин везифайрик хуьрерин мулкарин михьивал хуьнни акатзава. Им, фикир гайитlа, абур патал тlимил важиблу месэла туш. Общественный чкаяр зирзибилрин хъуртаризни гьамбарриз элкъуьр тавун патал райондин гьар са хуьруьн администрациядин кьили талукь тир серенжемар кьабулун чарасуз я. Гьа са вахтунда инсанрини чеб инсанар тирди рикlелай ракъурна кlандач.

Къейд ийин, эхиримжи вахтара агьалийри чпин хушуналди ва я мергьяматлувилин фондарин куьмекдалди хайи ерияр михьи авунин серенжемар тешкилзавай дуьшуьшарни малум я. Бес чна вуч ийизва? Михьи авуна кlани чкадал, акси яз, кьацlурзава… Ша, чна ихьтин гьалариз аксивал къалурин. Лугьудайвал, чиркин тийизвай чкада михьивални жеда.

К.Къалажухви