И йикъара Москвада путулкайра авай ятар ва ички квачир хъвадай затIар арадал гъизвайбуруз талукь вирихалкьарин WaterShow2019 форум кьиле фена. Важиблу месэлайриз талукь мярекатдал Россиядин, Къазахстандин, Украинадин, Латвиядин, Белоруссиядин, Армениядин, Литвадин 150 тешкилатдай 200 кьван инсанди иштиракна.
«Лезги газетдиз» Ахцегь райондин администрациядин пресс-къуллугъди хабар гузвайвал, путулкайра цанвай хъвадай ятарихъ галаз алакъалу месэлаяр кьве юкъуз веревирд авур ва хъвадай ятарин ери ахтармишай мярекатдал Ахцегь райондин Хкемрин хуьруьн чешмедай къачузвай «Арран» яд къизилдин медалдиз лайихлу хьана.
Къейд ийин, форумдал 14 хъвадай затIуниз къизилдин медалар ва 7 хъвадай затIуниз гимишдин медалар гана.
Ахцегь районда «Арран» минеральный яд 2017-йисалай арадал гъиз эгечIна. Алай вахтунда «Арран» Махачкъаладин, Каспийскдин, Дербентдин, Ахцегь райондин ва масанрин туьквенра маса гузва.
«Лезги газет»
