Алатай гьафтеда Ахцегьрин хуьре тарихдин вакъиа кьиле фена. Ина “Сбербанк” ПАО-дин алава филиал ачухна. Районрин уртах филиал ачухунин шадвилин серенжемда “Сбербанк” ПАО-дин Дагъустандин отделенидин управляющий Дмитрий Артемова, Ахцегь ва Рутул районрин кьилер Осман Абдулкеримова, Ибрагьим Ибрагьимова, До­къузпара райондин кьилин заместитель Салигь Гьажимурадова, идарайрин, тешкилатрин руководителри иштиракна. Мярекат ачухуналди, Осман Абдулкеримова къуншидал алай 3 райондин агьалияр патал яр­гъалди гуьзетиз хьайи Сбербанкдин цIийи филиал ачухунин метлеблувал къейдна.

— Зегьметдин гьа­къи къачун, налогар ва ча­расуз тир маса пулар гу­н, масаниз пул рекье тун патал пуд рай­ондин агьалийриз еке четинвилер арадал гъизвай. Абур рекьериз алава харжияр ва вахт серф авуниз мажбур жезвай. Ахцегьрин хуьре Сбербанкдин алава офис ачухуни чи ва къун­шидал алай районрин агьа­лийрин  игьтияжар хейлин­ де­­ре­жада таъминардай мум­кинвал гуда, — лагьана ада.

Дмитрий Артемова вичин тебрикдин рахунра дагълух чкада банкдин филиал ачухунин метлеблувал къейдна. Гила гьар са касдивай хейлин къуллугърикай менфят­ къачуз жеда. Ада лагьайвал, йи­салай-суз банкдин къурулуш хъсан жезва­, Сбербанкди вичин сеть гегьеншарзава.

Ибрагьим Ибрагьимовани 3 райондин агьалийриз и лишанлу вакъиа мубаракна. Гила банкдин къуллугърикай менфят къа­чуз­ хейлин регьят жеда. ГьикI лагьайтIа, Ру­тул райондин агьалияр банкдин къуллугърикай менфят къачун патал 180 километрдин яр­­гъа­ авай Кьасумхуьруьз ва я Мегьарамдхуьруьз финиз мажбур жезвай. Идани еке къулайсузвилер ва харжияр арадал гъизвай­.

Салигь Гьажимурадова филиалдин коллек­тивдихъ ва иниз къведай инсанрихъ кIвалахда агал­кьунар хьун вичин мурад тирдакай лагьана. Ах­цегь районда банкдин филиал ачухун агьалияр патал вижевай сав­кьат хьана. Идакди алава рабочий чкаяр яратмишнава, “Къаршидин алакъадин”­ серенжем кьезиларнава, банкдин къуллугъар къачуз регьят жеда.

Филиал ачухдай лент банкдин региондин отделенидин управляющийдихъ галаз санал 3 муниципалитетдин векилрини атIана. Ахпа Ахцегьрин хуьре “Сбербанк” ПАО-дин отделенидин руководитель Къурбан Къафарова мугьманар банкдин кабинетра авай тадаракрихъ галаз танишарна ва абуруз кьилиз акъудзавай къуллугърикай суьгьбетна. Дмитрий Артемова дараматдин хсусиятчидикайни хуш гафар лагьана.

Ибрагьим Ибрагьимова банк ачухун патал мукьуфдивди кIвалах тухвай “Ахцегь район” МР-дин кьил Осман Абдулкеримован лайихлувилер къейдна ва филиал тешкилунай банкдин руководстводиз чухсагъул лагьана. ИкI, филиалда агьалияр патал вири жуьредин къуллугъар кьилиз акъудда. Районрин уртахди тир цIийи филиал Ахцегьрин хуьре бинеламиш хьанва. Банкдиз ийизвай вири истемишунар гьисаба кьунва. Адан кабинетар 1-мертебада, къулай чкада ава. Адахъ гьаятни гала.

Ина электронный картадилай пул алудиз жедай­ банкдин терминаларни ава. Сер­гьят­ламишнавай­ мумкинвилер авай инсанар патални шартIар яратмишнава. ЦIийи идара видеоахтармишунин, цIаяр кьуниз акси сигнализациядин тадаракралди таъминарнава. Фи­лиалдин къуллугъчияр же­гьил пеше­ка­рар, Ахцегь ва Докъузпара рай­онрин агьалияр я. Атай гьар са кас хушвилелди къар­шила­миш­завай абур инсанриз герек тир вири куьмекар гуз гьазур я. Къуй Ахцегь, До­­къуз­па­­ра ва Рутул районрин агьа­лийрихъ кIва­­лахра агалкьу­нар ва агьваллувал хьурай.

Нариман Мамедов