И мукьвара РД-дин МФЦ-дин къуллугъчийри ватандашри гзафни-гзаф гузвай вад суал ва абурун жавабар интернетдин сетра раижна. Ингье абур.
- МФЦ-диз атун патал виликамаз нубатда акъвазун герек яни?
— Ватандашрин тIварар виликамаз кхьена, нубат-нубатралди кьабулунин къайдадал МФЦ-да кIевелай амалзава.
- 3-7 йис хьанвай аялриз талукь пулдин такьатар тайинарун патал герек чарар-цIарар гьикьван чIавалди кьабулда?
— И пособие къачун патал 2020-йисан 31-декабрдалди талукь документар кьабулзава. Виликан варцариз талукь пособиярни санал хгуда.
- Хизан эменни тIимил авайди яз тестикьардай справка МФЦ-да туькIуьриз жезвани?
— Эхь, жезва.
- Паспорт дегишар хъийидайла, документар вахтунилай вилик вугайтIа жедани?
— Къанундал асаслу яз, паспорт дегишарна кIани яшдив агакьзавай касдивай вич дидедиз хьайи йикъан пакадилай фад паспорт дегишариз хьун мумкин туш.
- Дидевилин капиталдин сертификат къачуна, амма ана авай пулдик хуькуьрнавачтIа, адан кьадар артух хъжедани?
— Эгер кьвед лагьай аял 2020-йисан январдилай инихъ девирда дидедиз хьанватIа (ва я веледвиле кьабулнаватIа), пулдин кьадар артух хъжеда.
«Лезги газет»
