Дагъустандин здравоохраненидин сайтда хабар ганвайвал, 2018-йисан  сад лагьай паюна 230 агъзурдалай артух дагъустанвийри чпин сагъламвал (диспансеризация) ахтармишна. И рекъемди  диспансеризациядик акатзавай агьалийрин 53 процентдилай виниз тешкилзава. Ахтармишай агьалийриз рикIинни дамаррин, эндокринный къурулушдин ва хуквадинни ратарин азарар авайди ашкара хьанва. Идалайни гъейри, абурукай 169 касдиз чIу­ру дакIунар авайди винел акъатна. А ксар тади гьалда азарханайра къаткурнава. Дагъустандин здравоохраненидин минис­терстводин пландин бинедаллаз, алай йисуз диспансерзациядик акатзавай ксарин кьадар 440 агъзурдалай виниз я.

Къейд авун лазим я хьи, РФ-дин гьар са гражданиндивай (21 йисалай алатайла) пуд йисалай са сеферда, поликлиникайриз фена, вичин сагъламвал ахтармишиз жезва. 2018-йисуз агъадихъ галай йисара дидедиз хьанвай ксаривай диспансеризация кьиле тухуз жеда: 1997, 1994, 1991, 1988, 1984, 1981. 1979. 1976, 1973. 1970, 1967, 1964, 1961. 1958, 1955. 1952. 1949, 1943, 1940. 1937, 1934, 1931. 1928, 1925, 1922.

Диспансеризация кьиле тухун патал паспорт ва страховой полис лазим къведа.

* * *

Мукьвара вич ачухна са йис тамам хьанвай республикадин перинатальный центрада дидейри 4 агъзурдалай виниз аялар ханва. Центрадин кьилин духтур Назим Османован гафаралди, алай аямдин вири тадаракралди ва виниз тир дережадин пешекарралди таъмин тир идара ишлемишиз вахкуналди Да­гъустанда вахтунилай фад ханвай аялрин уьмуьр хуьдай мумкинвал сифте сефер яз хьанва.

РикIел хкин: алай йисан мартдин вацра центрадин пе­шекарри 450 грамм заланвал аваз ди­дедиз хьайи руш къутармишна.

Къейд авун лазим я хьи, 2017-йисан июндин вацра ачухай центрада акушервилинни гинекологиядин хиляй азарлуйриз медицинадин вири куьмекар гузва. Идарада 150 койка, йиса 8 агъзурдав агакьна аялар хазвай ва азарлу дишегьлияр кьабулдай мумкинвал ава.

Чи мухбир