12-июлдиз Сулейман-Стальский райондин кьил Н.Абдулмуталибова райадминистрацияда нубатдин сеферда агьалияр кьабулунин серенжем кьиле тухвана. Идакай «Лезги газетдиз» муниципальный райондин пресс-къуллугъди хабар гузва.

И сеферда райондин кьилин патав 9 агьали атана. Абурук яшайишдиз, чилериз, хъвадай циз ва масабуруз талукь бязи месэлайри къалабулух кутунвай.

Герейханован 1-отделенидин агьалияр тир М.Мансуровадини Г.Ламетовади чпин кIвалихъ фидай рехъ авачирдакай хабар гана. Райондин кьили и месэладиз чкадал фена архитекторди ва пешекарри килигда лагьана. ЦIийи Макьарилай тир А.Демирова райондин кьиливай хъвадай цин ва къуншидихъ галаз чилин участокдин патахъай арадал атанвай гьуьжетдин месэлайрин патахъай куьмек гун тIалабна. И месэлаяр гьялун патални Нариман Абдулмуталибова чкадал пешекарар ракъурун ва талукь тир серенжемар кьабулун хиве кьуна.

Кьасумхуьрелай тир З.Жабраиловадини С.Керимовади Каспийский куьчеда къир цунин месэла къарагъарна. Адалайни гъейри, абуру малумарайвал, хъвадай яд рагъул жезвай дуьшуьшарни ава. И месэлани кьетIен гуьзчивилик кутуна ва талукь тир пешекаррал тапшурмишна.

Райцентрада яшамиш жезвай Рамидин Келбялиева цIилинин пагьливанвилин хел вилик тухунин фикир малумарна.

Райондин кьили вичин патав атай гьар са агьалидиз талукь жавабар гана, алакьдай куьмекар гун хиве кьуна. Вири месэлаяр ада вичин хсуси гуьзчивилик кутуна.

«Лезги газет»