…Апрелдин са юкъуз 8-клас­с­да сад лагьайди зи тарс тир — лезги чIал. Зенгинилай кьулухъ классдиз гьахьай зи вил эхиримжи столдихъ ацукьнавай руша акьуна. Чун таниш хьана. Чир хьайивал, ам хайи хуьруьз чIехи бубадин патав Ямало-Ненецкий Авто­номный округдин Муравленко ше­гьердай хтанвай  Кучува  Фатима  я.

Хив райондин Фригърин хуьряй тир Кучуврин хизан Россиядин Кеферпатан районриз акъатна хейлин вахтар я. Сифте Хан­ты­-Мансийский Автономный округдин Пыть-Як шегьердиз ва ах­па Ямало-Ненецкий Автономный округдин Муравленко шегьердиз. Фатимадин гъвечIи вахтар гьана аялрин бахчайра акъатна. Муравленкода ам 1-классдиз фе­на. 2-класс ада Фригърин юкьван мектебда куьтягьна. Ахпа мад 3-клас­сдилай 8-классдалди Муравленкода кIелна. Амма рушаз неинки лезгидалди хъсандиз рахаз, гьакI кхьизни, кIелизни чизва. Иник, гьелбетда, диде-бубадин зегьметарни квачиз туш. Хуьруьз хтайлани чIе­хи буба Къафлан ва чIехи диде Шерихан аялдиз дидед чIал хъсан­диз чирунал алахъ­дай­.

— Чун яшамиш жезвай Муравленкода лезгияр авач лагьайтIа, дуьз жезвач. Месела, 5-мектебда­, 1 ва 4-мектебра лезги аялри кIел­зава. Чун чал хатадай гьалтайла хайи чIалалди рахазва, амма бязибуруз ам зайифдиз чизва. Абуруни чпин диде-бубаяр кIвалени урусдалди рахазвайди сада­хъай­ни чуьнуьхзавач, — лугьузва Фати­мади гьайиф чIу­гунивди.

И хизанда а яргъа шегьерда 7 йиса авай Хадижадини 4 йиса авай Адама диде-бубадин бахтни шадвал артухарзава. Абуруз гьеле хуьруьз хтун кьисмет хьанвач. “ЯтIани, — давамарзава вичин­ ихтилат Фатимади, — абурузни ди­­­д­ед чIалан гзаф гафар чирнава. За умудзавайвал, зи вахни стха са тIимил вахтундилай хайи чIалалди рахада”.

Аферин ваз, Фатима!

Абдул Ашурагъаев,
ЦIийи Фригърин юкьван школадин муаллим