РАН-дин Дагъустандин илимдин центрадин ЧIалан, литературадин ва искусстводин институтдин къуллугъчийри чпихъ галаз санал кIвалахай Дагъустандин тIвар-ван авай алим, филологиядин илимрин доктор, профессор, Дагъустан Республикадин илимдин лайихлу деятель Талибов Букар Бекирович рикIел хкана.
Адан юбилейдиз талукьарнавай мярекатдиз институтдин къуллугъчияр, Б.Талибован мукьва-кьилияр, ам мукьувай чидайбур, ярар-дустар кIватI хьанвай.
Алимдикай хуш келимаяр рахуналди, мярекат институтдин директордин заместитель Борис Атаева ачухна ва Букар Талибован уьмуьрдинни яратмишунрин рекьикай доклад авун патал гаф филологиядин илимрин доктор, рагьметлудахъ галаз са кабинетда ацукьна кIвалахай Фаида Абубакаровна Гъаниевадиз гана.
Б.Талибовакай докладчи алимдикай, инсандикай, дустуникай хьиз рахана, адан къелемдикай хкатай илимдин кIвалахрал акъвазна.
Букар Талибова лексикографиядин хиле авунвай кIвалах иллаки кьетIенди я. Мегьамед Гьажиевахъ галаз санал абуру Дагъустанда сифтебурукай яз милли чIаланни урус чIалан словарь туькIуьрна. Урус чIаланни лезги чIалан словарь туькIуьрдайлани, Б.Талибова еке кIвалах авуна. Букар Талибова туькIуьрнавай «Лезги чIалан толковый (баянрин) словарди» Дагъустандин лексикографияда кьетIен чка кьазва. Ихьтин жуьредин словаррикай ам Дагъустанда сад лагьайди я. Вичин уьмуьрдин эхиримжи йикъарани алимди словардал (лезги чIаланни урус чIалан) кIвалахзавай.
Филологиядин илимрин доктор Иса Абдуллаев юбилярдикай лингвистдикай хьиз ваъ, вири патарихъай дерин чирвилер авай филологдикай хьиз рахана ва Букар Талибова Ленинградда кIелай йисара вичиз акур-такурдакай ийиз хьайи суьгьбетар рикIел хкана.
Алимдин хтул, Даггосуниверситетдин профессор, филологиядин илимрин кандидат, камаллу агъсакъал Гьажи Гашарова Букар Бекирович хизандин, мукьва-кьилийрин арада гьихьтин инсан тиртIа, музыкадин искусстводани адахъ аваз хьайи бажарагъдикай суьгьбетна. Ада къейд авурвал, Б.Талибов гъиле кьур кар кьилиз акъуддай, масадаз хъсанвал ийиз алахъдай зегьметкеш, гьахълувал кIандай инсан тир.
Филологиядин илимрин кандидат, Б. Талибовахъ галаз санал кIвалахай Саимат Юзбеговади рагьметлудахъ галаз словаррин винел зегьмет чIугур тегьер еке ашкъидивди рикIел хкана. 2003-йисуз Букар Талибов чавай гьамишалугъ яз къакъатна лагьай чIулав хабар агакьай югъ ИЯЛИ патал ясдинди хьанай къейдна алимди.
Мярекатдал чIехи алимдин руьгьдин къамат филологиядин илимрин кандидат Мегьамед Мегьамедова, филологиядин илимрин доктор Сабрина Шихалиевади ва масабуруни рикIел хкана, абур агъул, табасаран, цIахур, будугъ чIалар ахтармишунин рекьяй Букар Талибова бегьемарай кIвалахрин метлеблувиликай рахана.
«Лезги газетдин» литературадин отделдин редактор Мердали Жалилова вич рагьметлудахъ галаз таниш хьайи тегьер ва уьмуьрдай гьар жуьредин агьвалатар рикIел хкана. Ада къейд авурвал, Букар Бекировичаз чи халкьдин сивин яратмишунар, меденият, эдебият ва гьар са хуьруьн тарих лап хъсандиз чидай. Гьавиляй адакай гьахьтин дережадин алимни хьана.
Букар Талибован гуьзчивилик кваз илимдин кандидатвилин кIвалах кхьей сад лагьай аспирант, къе ИЯЛИ-дин къуллугъчи, студентрин рикI алай муаллим Агъаверди Рашидова юбилярдикай авур суьгьбет иллаки итижлуди хьана. Сухтади вичин муаллимдин къамат вири патарихъай рикIел хкана. Ада къейд авурвал, илимда гьар жуьредин пешекарар ава — садбур, гьайиф хьи, илимдив чпиз икрам ийиз таз алахъзава, муькуьбуру илимдиз вичиз икрамзава. Букар Бекирович илимдиз икрамзавай зурба алим тир.
Букар Бекировичан хтул Дагълар Талибова и мярекат тешкилайбуруз сагърай лагьана.
Эмираслан Шерифалиев
