Ахцегь райадминистрациядин къаюмвилик кваз, ЧIехи Гъалибвилин Йикъан серенжемрин сергьятра аваз, и мукьвара Ахцегьа жегьил пагьливанрин арада, азаддиз кьуршахар кьунай Дагъустанда СССР-дин 1-мастервилин тIвар къазанмишай Абдулали Гъаниеван экуь къамат рикIел хуьнин лишан яз, республикадин кIвенкIвечивал къазанмишун патал ачух турнир кьиле тухвана.
Къейд. Абдулали Мегьамедвелиевич Гъаниев 1929-йисан 8-мартдиз Ахцегьа дидедиз хьана (1987-йисуз рагьметдиз фена). ТIебии бажарагъ-къуват авай ам пешекар спортдал армиядин жергейра къуллугъзавай 1951-1953-йисара машгъул хьана, Туркестанский военный округдин чемпионвилин тIвар къачуна. Гуьгъуьнлай Дагъустанда азаддиз кьуршахар кьунай къизилдин медаль къазанмишна. Ахпа Дагъустандин хкягъай командадик кваз Вирисоюздин дережадин жуьреба-жуьре акъажунра иштиракна, республикада азаддаказ ва грекринни римлуйрин жуьреда кьуршахар кьуник, спорт вилик тухуник вичин пай кутуна. 1955-йисуз СССР-дин спортдин мастервилин тIвар къачуналди, ам тарихда азаддиз кьуршахар кьунай Дагъустанда сифте пагьливан яз гьатна. Гуьгъуьнлай гзаф йисара ада Ахцегь райондин спортдин “Урожай” тешкилатдин председателвиле ва тренервиле кIвалахна. Къурбан Агъаев, Султан ва Сулейман Эфендиевар, Къадир Пирсаидов, Абумуслим Вагьабов, Эсед Шагьмарданов, Мегьамедвели Гъаниев хьтин са жерге машгьур пагьливанар тербияламишна.
Мярекатда азаддиз кьуршахар кьунай спортдин мастер, международный категориядин (МК) судья Мугъмин Гъаниева, азаддиз кьуршахар кьунай МК-дин судья ва спортдин мастер (МСМК), спортдин ветеранрин арада 2 сеферда дуьньядин чемпион Ламет Муртазаева, Дербент шегьердин спортшколадин тежрибалу тренер, азаддиз кьуршахар кьунай спортдин мастер, тежрибалу судья Гьажи-Али Гъаниева, азаддиз кьуршахар кьунай ветеранрин арада Россиядин чемпион ва Европадинни дуьньядин чемпионатрин призёр Къариб Ашуралиева ва маса пешекарри иштиракна.
И акъажунар республикадин жегьилрин арада лап нуфузлубур я, гьикI хьи, абуру Дагъустандин стха халкьарин дуствилин алакъаяр мягькемарунин, жегьилар ватанпересвилин руьгьдаллаз тербияламишунин, жегьил пагьливанрин устадвал хкажунин ерийриз къуллугъзава. И акъажунриз лап хъсан гьазурвал акунвай: А.Гъаниеван тIварунихъ галай ДЮСШ-дин дарамат ремонтнавай, зал тадаракламишнавай, мугьманриз ял ядай къулай шартIар яратмишнавай…
Акъажунра иштиракун патал Ахцегьиз Махачкъала, Дербент, Дагъустандин Огни шегьеррай, Белиж поселокдай, Докъузпара, Къайтагъ, Кьурагь, Мегьарамдхуьруьн, Рутул, Сулейман- Стальский районрай жегьил пагьливанар, гьакI абурун диде-бубаярни тренерар атанвай. Нетижада 11 командадик кваз 186 пагьливанди иштиракна.
Мугьманар райондин кьил Осман Абдулкеримован, райсобранидин председатель Абдул-Керим Палчаеван ва вичин тIварунихъай тебрикуналди ва зурба пагьливан А. Гъаниев рикIел хкуналди, акъажунар Ахцегь райадминистрациядин кьилин заместитель Алмас Шуаева ачухна. Спортдин суварин тешкилатчийрин, иштиракчийрин ва тамашачийрин тIварарихъ хуш келимаяр А.Гъаниеван хтул, азаддиз кьуршахар кьунай спортдин мастер Мегьамедвели Гъаниева ва масабуруни лагьана. Ахцегьрин искусстводин школадин аялри чпин кьуьлералди ва РДК-дин гьевескарри манийралди жегьил пагьливанрин гуьгьуьлар хкажна.
Пакамалай няналди кьве гьасиррал давам хьайи къизгъин бягьсерин нетижада заланвилин 10 категориядай акъажунрин чемпионарни призёрар тайин хьана. Гъалибвилин 1,2, ва 3-чкаяр кьур вири пагьливанар “Ахцегь район” муниципалитетдин патай талукь тир дережайрин кубокриз, дипломриз, медалриз ва пулдин пишкешриз лайихлу хьана.
Агъадихъ чна турнирдин чемпионрин тIварар кьазва: А.Агъаширинов (28 кг, Белиж), Н.Кельбиханов (30 кг, Сулейман-Стальский район), А.Набиев (33 кг, Ахцегь), М.Кубачаев (35 кг, Дербент), С.Магьарамов (38 кг, Огни), А.Таиров (41 кг, Белиж), Ш.Шамхалов (44 кг, Белиж), А.Ремиханов (57 кг, Дербент), Р.Къараханов (69 кг, Белиж), Б.Мисриханов (74 кг, Ахцегь).
Мугьманар хушвилелди кьабулиз, акъажунар вини дережадин тешкиллувал аваз, кьиле тухуз ва разивилелди рекье хутаз алакьун, эвелимжи нубатда, Ахцегь ДЮСШ-дин педколлективдин (директор Марсел Гьажиев) агалкьун я. Баркалла!
Дашдемир Шерифалиев
