Абумислим Сефербегович Гьамидов 1937-йисуз Кьурагьрин хуьре Сефербег ва Перизат Гьамидоврин хизанда дуьньядал атана. Хуьруьн юкьван мектеб акьалтIарайдалай кьулухъ автошколадиз гьахьна.
Пуд йисуз Германияда СССР-дин Яракьлу къуватрин жергейра къуллугъайдалай кьулухъ ДАССР-дин КПСС-дин Кьурагьрин райкомда, райондин духтурханада водитель яз кIвалахна. 1964-1977-йисара адакай Кьурагьрин райисполкомдин председателдин водитель хьана.
Гуьгъуьнлай А.Гьамидова Дагъустандин хуьруьн майишатдин техникумда, РСФСР-дин заготовкайрин министерстводин пешекаррин ва крар идара ийидай къуллугъчийрин пешекарвал хкажзавай институтда кIелна, Кьурагь районда государстводин заготовительный инспектордин, райондин АПК-дин старший зоотехникдин, государстводин кьилин инспектордин везифаяр тамамарна.
2000-йисуз Абумислим Гьамидов пенсиядиз экъечIна. Яргъал йисара республикадин хуьруьн майишатдин хиле бегьерлудаказ зегьмет чIугунай адаз жуьреба-жуьре шабагьар гана.
Вичин уьмуьрдин юлдаш Иминат Семедовнадихъ галаз санал абуру 2 хвани 4 руш чIехи авуна.
Пенсияда авай вахтунда А.Гьамидова райондин жемиятдин уьмуьрда активнидаказ иштиракзавай. Хуьруьн майишатдал рикI алай дагъви чIижерхъанвилелни машгъул жезвай. Абумислим Гьамидован хизанди хсуси такьатрихъ алай йисуз Кьурагьрин “Къурбалияр” магьалда авай ким цIийикIа туьхкIуьр хъувуна.
А.Гьамидов залан азардикди алай йисан ноябрдин вацра рагьметдиз фена.
“Лезги газетдин” редакциядин коллективди РД-дин Хатасузвилин Советдин Секретардин заместитель Сефербег Гьамидович Гьамидоваз — ими, вири мукьва-кьилийриз Абумислим Гьамидов рагьметдиз финихъ галаз алакъалу яз башсагълугъвал гузва.
«ЛГ»
