Подписка — 2023
Хайи чIал хуьз…
Играми ватанэгьлияр! 2023-йис патал куь рикI алай изданияр кхьидай вахт алукьнава
“Лезги газет” вилик йисара хьиз, къведай йис патални почтадин алакъадин отделенийрай ва “Дагпечатдин” киоскрай кхьиз жеда. 2023-йис патал хайи чIалал акъатзавай газет кхьинин къимет шазандалай хкаж хьанва. Почтадин алакъадин отделенийрай йис патал — 935 манатни 94 кепекдихъ, зур йис патал 515 манатни 28 кепекдихъ кхьиз жеда. Киоскрай кхьинин къимет дегиш хьанвач: йис патал шаз хьиз, цIини — 456 манат, зур йис патал 228 манат я.
РикIел хкин, Кьиблепатан Дагъустанда “Дагпечатдин” киоскар Ахцегьа, Мегьарамдхуьре, Кьасумхуьрел, Белижда, Дербент ва Дагъустандин Огни шегьерра кардик ква.
Са кар мадни къейд ийин: “Лезги газет” Урусатдин почтадин официальный сайтдайни (ссылка — https://podpiska.pochta.ru/) кхьиз жезва, анжах — Дагъустандиз. Мисал яз, Москвада, Тюменда ва я къецепатан са уьлкведа авай ватанэгьлидивай винидихъ къейднавай сайтдиз гьахьна, “Подписка онлайн” разделда, индексрин куьмекдалди (йис патал — ПП200, зур йис патал — ПП171) “Лезги газет” жагъурна, Дагъустанда яшамиш жезвай вичин мукьва-кьилийриз газет кхьиз жеда.
Дагъустандилай къецепата яшамиш жезвай стхайривайни вахаривай газет анжах электронный къайдада (пдф-форматда) кIелиз жеда. И къайдадикай менфят къачун патал “Лезги газетдин” сайтда онлайн-подписка (йис патал — 350 манат, ссылка — https://lezgigazet.ru/podpiska) авуна кIанзава. Къейд ийин хьи, йисан гьисаб подписка авур йикъалай гатIунзава. Эгер куьне, мисал яз, онлайн-подписка алай йисан ноябрдин вацра авуртIа, 2023-йисан ноябрдин вацра подпискадин вахт куьтягь жеда.
Вилик йисара хьиз, цIини редакцияди “Лезги газет” — гьар са кIвализ” серенжемни кьиле тухуда. Адан куьмекдалди мумкинвилер авай ватанэгьлийривай чпин хайи районриз, хуьрериз, яшлубуруз, дарда авай хизанриз, мектебра кIелзавай аялриз милли чIалал акъатзавай газет кхьиз жеда. Мергьяматлу и серенжемда иштиракиз ва 2023-йис патал “Лезги газет” кхьиниз талукь суалар гуз кIанзавайбурувай чахъ галаз телефондин 8-928-584-16-72 нумрадин куьмекдалди алакъадиз экъечIиз жеда.
Играми стхаярни вахар! Ша чна вирида “Лезги газет” кхьин! Ам куьне хайи чIал хуьник кутазвай пай хьурай!
«Лезги газет»
