Цлахъви ашукь Рагьиманни КIеле хуьруьнжуван рушан гьуьжетдикай
И вакъиа алатай асирдин 30-йисара КIарудин суварик кьиле фейиди я. Ашукь Рагьимав пурар алай лацу балкIан гвай. Адахъ вичин куьмекчи гада Къафланни галай. ГьикI ятIани, Рагьиманни са рушан арада гьуьжет арадал къведа. ПIинидин багъдин юкьвал, вири махлукьат кIватI хьанвай чкадал, руша икI лугьуда:
— Эгер зун кумукьайтIа, зун ашукь Рагьимаз фида (зарафатдалди), тахьайтIа Рагьима вич алаз атанвай балкIан заз гуда.
Рагьим:
Кьакьан синел пIинидин тар,
Гар галукьиз юзазава.
Агъдин перем алай суна,
Вун пешерив къугъвазава.
Руш:
Кьакьан синел пIинидин тар,
Гар галукьна юзадайд туш.
На буш гафар лугьуналди,
КIелеви руш ваз къведайд туш.
Рагьим:
Тарцел алай лацу пIини,
Алай хилел яд хьурай ман.
Эгер ваз зун кIани ятIа,
Чи кьведан сир сад хьурай ман.
Руш:
Тарцел алай лацу пIини,
Ам а тарал яд жедани?
Са кьве мани лугьуналди,
Чи кьведан сир сад жедани?
Рагьим:
За тафт ядай лацу гъилер,
Сериндик кваз кузава хьи.
Ширин чанда дердер амаз,
Яр масадаз гузава хьи.
Руш:
На тафтунал лагьай чIалар,
Зи япариз ван хьанава.
Цлахъжуван Рагьим гада
Вун зи рикIиз кIан хьанава.
Рагьим:
Диде-буба кьвед сад хьана,
Я руш, вун заз гузавач хьи.
Ша чна чи гъил-гъиле кьан,
Баку патаз санал катин.
Руш:
Ашукь Рагьим, къастар еке,
Манийралди твамир кIеве.
Баку патаз катун хьайтIа,
Чал хъуьреда вири Куьре.
Рагьим:
Руш, вал алай московдин хун,
Ваз са вад юкI дере кIандай.
Заз гудачтIа уьмуьрда вун,
Ваз рикI кудай диде кIандай.
Руш:
ХъуьтIуьн цикIиз акъатай къай,
Гатфаралди амукьдайд туш.
Гьикьван чIалар на лагьайтIан
КIелеви руш ваз къведайд туш.
Цлахъви ашукь Рагьиман гада Къафлан залай чIехи тир. Алатай асирдин 60-70-йисара ада Хив районда лабораториядин заведующий яз, райондин хуьруьн майишатдин управленида, совхозда, кьилин агроном яз кIвалахнай. Адахъ кьилин образование авай. За районда кIвалахдайла чун кIеви дустар тир.
Ада ара-ара вичин буба Рагьимакай суьгьбетар ийидай, кефияр къунбар хьайила манияр лугьудай.
Са сеферда ам маса юлдашарни галаз заз мугьман хьайила ада, столдал тIампIар ягъиз, хъсан сесиналди манияр лугьузвай. И агьвалат акур зи кайваниди ам вуж ятIа чин тийиз “Им Цлахъа авай буьркьуь Рагьим хьиз акъваззавач хьи”, — лагьайла адаз тIимил хъелни атанай. Адаз 4 рушни са гада авай. Вири кIвал-югъ хьана динж я. Гада Дербентда яшамиш жезва. Вич 10 йис идалай вилик Дербентда рагьметдиз фена.
Рамазан Велибегов
