24-августдиз Урусатдин Президент Владимир Путина уьлкведин пенсионерриз са сеферда 10 агъзур манат гунин гьакъиндай Указдал къул чIугуна.
Пулдин такьатар пенсионеррив алай йисан сентябрдин вацра агакьун лазим я. 10 агъзур манат къачун патал арзаяр ва я маса чарар-цIарар гьазурунин лазимвал авач. И макьсаддиз акъатзавай харжар федеральный бюджетдай чара ийидайвал я.
Пенсионерриз алава пулдин такьатар гудайдакай Владимир Путина 22-августдиз хабар ганай. Уьлкведин регьбердин гафаралди, и пул вири пенсионеррив агакьда, гьа жергедай яз — кIвалахзавайбурувни.
ТАСС-ди хабар гузвайвал, В.Путинан маса Указдин бинедаллаз военный къуллугъчийриз ва къанун-къайда хуьдай органрин векилриз са сеферда 15 агъзур манат пул гуда. Уьлкведин финансрин министр Антон Силуанован гафаралди, Президентдин кьве Указ кьилиз акъудун патал саки 500 млрд манат пул харждайвал я.
«Лезги газет»
