18-октябрдиз мусурманрин календардалди рабиуль авваль варз алукьнава. Ам мусурманрин календарда пуд лагьай варз я. Рабиуль аввалдин кьетIенвал, сифте нубатда, адакай ибарат я хьи, и вацра Мугьаммад пайгъамбар (къуй Аллагьдин патай салават ва саламар хьурай вичиз) дидедиз хьана ва гьа и вацра ам рагьметдизни фена. Идалайни гъейри, и вацра са бязи мусурманри гьижра авуна (Меккадай Мединадиз куьч хьана).
И вацра жуьреба-жуьре ибадатрин кьадар артухарунихъ еке метлеб ава. Мисал яз, гьар юкъуз Къуръан кIелун ва ам кIел-завайдахъ яб акалун, Пайгъамбардин (къуй Аллагьдин патай салават ва саламар хьурай вичиз) уьмуьрдин рехъ чирун, ада авур крарал, къалурай меслятрал амал авун, жезмай кьван гзаф салават кIелун, мукьва-кьилийрал кьил чIугун, диндин рекьяй таблигъат тухун, садакьаяр гун, дуьаяр авун, сивер хуьн ва икI мад. Къейдна кIанда, винидихъ тIвар кьунвай крар мусурманди тек са и вацра ваъ, амай варцарани авун хъсан я.
РикIел хкин, алай йисуз Махачкъалада лезги чIалал “Мугьаммад пайгъамбардин (къуй Аллагьдин патай салават ва саламар хьурай вичиз) уьмуьрдин рехъ” тIвар алай ктаб чапдай акъатнава. Ам “Лезги газетдин” редакциядай маса къачуз жеда. Къимет — 500 манат.
Играми газет кIелзавай стхаярни вахар! Чна квез рикIин сидкьидай чи Пайгъамбар (къуй Аллагьдин патай салават ва саламар хьурай вичиз) хайи варз мубаракзава. Ада къалурай рехъ давамарун гьар са мусурмандин везифа я. И рекье чун сад хьана кIанда. Къуй Аллагьди чи гунагьрилай гъил къачурай ва чун Женнет кьисмет жедайбурун жергейра хьурай. Амин!
Мегьамед Ибрагьимов
