Дагъустандин госуниверситетди абитуриентар кьабулдай кампаниядин кьилин ва асул паяр  акьалтӀарна, хабар гузва вузди. Малум хьайи­вал, алай йисуз ДГУ-дик экечIун патал садрани тахьай кьадар арзаяр агакьнава – 32 861. Са йис идалай вилик абурун кьадар (чирвилер гунин вири дережаяр ва жуьреяр санал) 27 053-даз барабар тир.

Чна идалай виликни хабар гайивал, цIи ДГУ-дин бюджетдин гьисабдай тир чкайрин кьадарни гзафарнава: СПО – 155 чка (2025-2026-йисуз – 115); бакалавриат, специалитет ва магистратура – 1245 чка (идалай вилик йисуз – 1158); аспирантура – 21 чка (2025-2026-йисуз – 6). Магистратурадиз ганвай арзайрин кьадар тахминан 3 сеферда гзаф хьанва – 98-далай 274-дал кьван.

Эхиримжи йисара къейдзавай  информациядин технологийриз, физикадинни математикадин ва тIебии илимрин хилериз ийизвай итиж къвердавай гзаф хьунин гьерекат и йисузни давам хьана. ИкI, физикадинни техникадин факультетда конкурс идалай вилик йисуз садан чкадал 5 кас тиртIа, цIи ина са чка патал 6-далай гаф арзаяр агакьна. Гьа са вахтунда 2026-йисуз  бакалавриатдин программайрай бюджетдин 140 чка ачухнава. Шаз абур 82 авай.

Информатикадин ва информациядин технологийрин  факультетда кIелун патал выпускник­рин патай 2480 арза атанва, юридический институтдиз – 1635; къецепатан чIаларин факультетдиз – 1170. Математикадин ва компьютеррин илимрин факультетдик экечIдай фикир авайди 1102 касди малумарна.

Вуздин пресс-къуллугъди хабар гузвайвал, ДГУ-да виридалайни еке конкурс «Юриспруденция»  (са чка патал 71,2 арза), «Экономика» (49,4) ва «Лингвистика (ингилис/китай чIал)» (24,9 арза) хилера ава.

КьетIен фикир вузди кьезилвилер авай къатарик акатзавай агьалийриз, СВО-дин иштиракчийриз ва абурун хизанриз, гьам университетдик экечIдайла, гьамни кIелзавай вахтунда куьмек гунин месэладиз гузва. Сифтегьан паюнин­ вахтунда, кьетIен квотадин сергьятра аваз, 63 кас кьабулнава, кьилдин квотадай – 114 ва тайин­ макьсаддихъ элкъуьрнавай квотадай – 11. Малум хьайивал, алай йисуз тайин макьсаддихъ элкъуьрнавай ва кьетIен квотаяр патал чара авунвай, амма тамамдаказ ацIун тавунвай чкаяр кьилди къачур квотадиз рекье хтуна. Ида лагьайтIа,  СВО-дин иштиракчияр, женгинин гьерекатрин ветеранар, абурун аялар ва хендедаяр сифтедай фикирда кьунвайдалай гзаф кьадар кьабулдай мумкинвал гана.

Саида  Мурадова