Сулейман-Стальский райондин Курхуьряй саки кьве виш муаллимни 50-дав агакьна алимар акъатнава. 1987-йисуз муаллимрин хизанда дидедиз хьайи Тагъиев Юсуф Руслановича 2004-йисуз агалкьунралди хуьруьн мектеб акьалтIарна. ГъвечIи чIавалай математикадиз кьетIен итиж авур Юсуф Даггосуниверситетдин математикадин факультетдик экечIна. Ада эхиримжи курсара кIел­завайла а вахтунда Дербентдин педучилищедин  директор Гьажиагьмед Къазиагьмедов  хъсан чирвилер авай жегьил пешекар хкягъун патал ДГУ-диз атана. Студентрин чир­вилер ахтармишай Гь.Къази­агьмедова Юсуф Тагъиев вуз акьал­­тIарай­далай кьулухъ Дербентдин педучилищедиз кIвала­хал кьабулдай икьрар кутIунна. Вуздилай гуьгъуьниз къадим шегьердин педучилищеда математикадинни информатикадин муаллим яз кIвалахал акъвазай Юсуф Тагъиев хъсан пе­шекар яз аш­кара хьана. Адал курсунин куратордин везифаярни ихтибарнава. Юсуф Тагъиева кIва­лахзавай чкада вичин активвал къалурзава, тарсара технологиядин ва методикадин рекьерай алай аямдин такьатрикай менфят къачузва, конкурсра ва маса мярекатра иштиракзава.

2011-йисуз “Педагогические инновации”  конкурсдин сергьятра аваз математикадин месэлаяр адетдин тушир тегьерда гьялунай ам 2-дережадин дипломдиз лайихлу хьана.

2013-2014-йисара Юсуф Тагъиевакай Обнинск шегьерда кьиле фейи Вирироссиядин “Научный потенциал” конкурсдин лауреат хьана. Муаллимринни алимрин конкурсрин иштиракчи ва гъалибчи тирди субутзавай шабагьар Юсуф Тагъиевахъ мадни ава.

Бажарагълу му­аллимди вичи тарс гузвай студентарни илимдин кIвалахдал желбзава ва абуруз чпихъ авай алакьунар раиждай мумкинвал гузва.

Райсудин  Набиев