“Лезги газетдин” тарихда сифте яз кIелзавайбурун арада мусурманрин диндиз талукьарнавай конкурс кьиле тухвана.
25-майдиз Махачкъалада, “Лезги газетдин” редакцияда, Ислам диндиз талукьарна кьиле тухвай конкурсдин нетижаяр кьуниз ва гъалибчияр тебрикуниз талукьарнавай мярекат кьиле фена.
РикIел хкин, алай йисан Рамазандин вацра редакцияди газет кIелзавайбурун арада “Лезги газетдиз” акъатнавай диндин макъалайрин бинедаллаз Исламдиз талукьарнавай конкурс малумарнай. Садлагьана уьлкведа пайда хьайи коронавирусдин тIугъвалдихъ галаз алакъалу яз, тешкилатчийри нетижаяр кьунин месэла яргъа вегьенай.
Мярекатда “Лезги газетдин” кьилин редактор Мегьамед Ибрагьимова, адан заместитель Куругъли Ферзалиева, диндин рекьяй алим Ямин Мегьамедова, меценат Шагьпаз Асаханова ва кIвенкIвечи чкаяр кьурбуру иштиракна.
Вичин рахунра М.Ибрагьимова къейд авурвал, газетдин тарихда сифте яз цIи кIелзавайбурун арада мусурманрин диндиз талукьарнавай конкурс кьиле тухвана. Ам тешкилунин макьсад газет кIелзавайбурухъ диндин рекьяй авай чирвилер артухарун, инсаният патал Исламдихъ авай метлеб, кьетIенвал къалурун, кIелзавайбурун арадай диндин рекьяй дерин чирвилер авайбурун алакьунар къейд авун тир. Кьилин редактордин гафаралди, конкурс тухунин меслят гайиди газетда кардик квай “Дин” рубрика кьиле тухузвай Ямин Мегьамедов я. М.Ибрагьимова конкурсда иштиракай виридаз сагърай лагьана ва редакциядихъ галаз инлай кьулухъни алакъаяр хуьниз эвер гана.
Конкурсдихъ Ислам дин хуьнин ва вилик тухунин карда кьетIенвал авайди Ямин Мегьамедовани къейд авуна. Адан гафаралди, ихьтин серенжемри газет кIелзавайбур диндин, мергьяматлувилин, эдеб-ахлакьдин бинейриз мукьва ийизва, газет кIелзавайбурухъ диндин рекьяй авай чирвилер артухарзава.
Конкурсдин нетижайрал асаслу яз, 1-чка Ахцегь райондин Луткунрин хуьряй тир Мугьаммад Мегьамедова кьуна. Кьилин пишкеш — “Xiaomi Regmi 8 64 Гб” смартфон ва 3000 манат гьадаз кьисмет хьана. 2-чкадал Мегьарамдхуьруьн райондин Билбил-Къазмайрилай тир Ханбике Магьарамова акъатна. Адав азан ядай сят ва 2000 манат вахкана. 3-чкадиз фадлай чи газетдихъ галаз алакъа хуьзвай авторрикай сад тир, Дербент райондин Белиж поселокда яшамиш жезвай Гьасан Гьуьсейнов лайихлу хьана. Адаз капI ийидай халича ва 1000 манат гана.
Винидихъ тIвар кьур савкьатрилай гъейри, гъалибчийриз дипломар, “Мугьаммад Пайгъамбардин уьмуьрдин рехъ” тIвар алаз лезги чIалал акъатнавай ктабар ва Замзамдин яд гана.
Къейд ийин хьи, редакцияди, Аллагьди гайитIа, инлай кьулухъ гьар йисуз Ислам диндиз талукьарнавай конкурс кьиле тухудайвал я. Къведай йисуз ихьтин конкурс мад Рамазандин вацра тешкилда. Суаларни “Лезги газетдиз” акъатзавай диндин макъалайрин бинедаллаз туькIуьрда.
Агьмед Магьмудов
