Къе чна «Лезги газет» кIелзавайбурун вилик ашукь Адил Уьнуьгъвиди (Адил Сафаров) кхьей «Перизада» мани гъизва. И кардихъни вичин себеб ава. Манидал зегьмет чIугур мусанифрин тIварар несилрин рикIелай алатуналди, ам са гьихьтин ятIани суьгьуьрдин жуьреда «халкьдиндаз» элкъвезва. Гаф кватай чкадал къейд авун лазим я хьи, лезги халкьдин медениятдин жебеханада «Перизада» тIвар алай манияр, гьам халкьдинбур, гьамни кьилдин мусанифринбур, лап гзаф ава. Амма чун рахазвай манидихъ вичин мусанифни тажубардай несиб ава. Гьа и кардикай са тIимил рахун тавуна жедач.

Дагъустанда ашукь Адил Уьнуьгъвидин къелемдикай 2005-йисуз хкатнавай «Перизада» мани, заз чидайвал, вичин чIалалди талгьай са халкьни амач, гьатта ам урус, азербайжан чIаларалдини тамамарзава. И карди къенин юкъуз чаз и мани, рагьметлу СтIал Сулеймана лагьайвал, «мудда» гьатнавайди артухан сеферда субутар хъийизва.

Макъаладин эхирдай чаз ашукь Адил Уьнуьгъвиди­ кхьей «Перизада» манидин тарихдихъ галаз мукьувай таниш жез кIанзавайбурувай адакай Кьасумхуьруьн теле­виденида лезги чIалалди кьиле физвай «Куьредин тав­хана» тIвар алай передачайрикай сада Эдуард Ашурагъаева, ам гьикI халкьдин кIвачихъ ягъиз алахънаватIа, ­гегьеншдаказ суьгьбетзавайдакай хабар гуз кIанзава. Авайвал лагьайтIа, а мани вичикай гегьенш макъала кхьиниз лайих­луди я, амма и сеферда чна, и куьруь суьгьбетдал акъвазуналди, а кар макьаматдин пешекаррин хиве тада. 

Перизада

Мехъерринни мелерин ван,
Чи абурдик кутазвай чан.
Вун я дамах лезги халкьдин,
Перизада, Перизада.

Тикрарбенд:
Рушар, сусар хунчаяр гваз,
Мецел манидин ван алаз.
Вир(и)да санал лугьузвайди:
Перизада, Перизада.

Ви манидин ван бес вучиз
Хквезамач чи япариз?
Лагь, диде чан, ван алахьиз:
Перизада, Перизада.

Лезги дагълар, багъни аран
Хуш я рикIиз хаму жейран.
Вун я мелгьем заз гузвайди,
Перизада, Перизада.

Ашукь Адил – уьнуьгъви хва,
Лезги рушар – рикIин майва.
Вун са яр я захъ авайди,
Перизада, Перизада.