Алатай хемис юкъуз чаз мугьаррам варз (гьижрадин 1442-лагьай йис алукьна).
Мугьаррам варз “къадагъа алай кьуд вацракай” сад я ва адахъ кьетIенвилер ава. Абурукай сад, гьадисда къалурнавайвал, рамазандин вацралай гуьгъуьниз мугьаррам вацра хвейи сивер виридалайни лайихлубур я. Гьавиляй гьар са мусурман кас и вацра гзаф сивер хуьз алахъна кIанда. Иллаки кIуьд ва цIуд лагьай йикъара (яни Тасуа ва Ашура йикъар, абур и гьафтедин жуьмя ва киш йикъар жезва).
Гьадисда лагьанва, (мана):“Ашура йикъан сив хуьни алатай (вири) йисан гунагьар багъишда”. (Муслим).
Мад са гьадисда къалурнава: “Пайгъамбарди (къуй Аллагьдин патай салават ва саламар хьурай вичиз) Ашура юкъуз сив хвена ва асгьабризни а юкъуз сив хуьн эмирна” (Бухайрий, Муслим).
Маса гьадисда къейднава, (мана): “Эгер зун къведай йисалди амукьайтIа, за, дугъриданни, кIуьд, лагьай юкъузни сив хуьда”. (Муслим).
Къейд авун лазим я, са бязи ксари Ашура юкъуз ийизвай крар (шахсей-вахсей….) дуьзбур туш. Абур я Къуръанда, я Суннада авачир, делилсуз крар я.
Чна Аллагьдивай чаз куьмек гун ва чи сивер, ибадатар кьабулун тIалабзава! Амин!
«Лезги газет»
