23-августдиз (эхиримжи саки 25 йисуз, зун ягъалмиш туштIа, гьар йисуз кьиле тухузва) хъсан адетдиз элкъвенвай серенжем — шейх, зурба арифдар, пуд имамдин насигьатчи Мегьамед Ярагъвидин сурал Согратль хуьруьз машинар цIиргъина аваз (автопробег) зияратдал фин тешкилнавай. Машинрин рехъ пакаман сятдин 8-даз «Левашидин гьалкъа» алай чкадилай башламиш хьана. Тешкилатчияр Дагъустандин Муфтият ва Мегьамед Ярагъвидин фонд тир. Автопробегдин иштиракчийрин арада жуьреба-жуьре яшарин инсанар авай. Согратлда абур балкIанрал алаз чкадин агьалийри къаршиламишна ва мискIиндал кьван рекье туна. Ина диндин межлис кьиле фена.
Межлис кьиле тухузвай СтIал Сулейманан райондин имамрин советдин председатель Шамил Омарова, кIватI хьанвайбурухъ элкъвена, чими келимаяр лагьана. Мярекатда гьакIни РД-дин Муфтиятдин Дагъустандин Кьиблепатан округдин мулкара тамам ихтиярар ганвай векил Мугьаммадрамазан Ражабова, Гуниб райондин имамрин советдин председатель Ибрагьим Абдулаева, Мегьамед Ярагъвидин тухумдай тир Агьмад Мегьамедова, хуьрерин имамри ва маса ксари, багьа мугьманри иштиракна. Абур мусурман стхайрин арада дуствиликай, Ватан кIан хьуникай, арифдаррин экуь къаматар рикIера хуьникай, абур акьалтзавай несилдиз чирун лазим тирдакай рахана.
Межлисдилай гуьгъуьниз вири шейхдин сурал фена.
Рагнеда Рамалданова
