Алатай гьафтеда Каспийск шегьерда кьиле фейи рекъемрин форумдин сергьятра аваз тешкилай «Цифра VS бумаги. Развитие печати в эпоху цифровой трансформации» тIвар ганвай секциядал «Лезги газетдин» кьилин редактор, РФ-дин журналистрин cо­юздин РД-да авай отделенидин председатель Мегьамед Ибрагьимова рекъемрин алем вилик фенвай девирда Дагъустандин милли чIаларал акъатзавай изданияр хуьнин месэлайриз талукьарнавай презентация къалурна. Ам «Лезги газетдин» редакцияди кьилиз акъудзавай проектрин бинедаллаз гьазурнавай.

Изображение

Редакцияди рекъемрин рекьяй кьиле тухузвай кIвалахдикай рахадайла, М. Ибрагьимова респуб­ликадин милли газетрин архивар электронный къайдадиз элкъуьрунихъ еке метлеб авайди къейдна. Кьилди «Лезги газетдикай» ра­хайтIа, кьилин редактордин гафаралди, адан архив 1942-йисалай гатIунзава.

«Газетдин тарих 1920-йисалай гатIуннаватIани, гьайиф хьи, архивда 1942-йисалди чапдай акъа­тай газетар авач. «Тарихдин шагьидар» электронный къайдадиз элкъуьрунин кIвалахдал чна меценатар желбзава, гьикI лагьайтIа, и кардиз гьукуматдин патай пулдин такьатар чара ийизвач, месэла редакциядин къуватралди гьялзава», – къейдна ада.

М. Ибрагьимован гафаралди, газетар электронный къайдадиз элкъуьруьни медениятдин чIехи ирс хуьз, хайи чIал вилик тухуз ва жемиятдин гегьенш къатариз тарихдин жуьреба-жуьре вакъиайрикай, халкьдин милли адетрикай, яшайишдикай, чIалакай гзаф итижлу малуматар авай чешмейрикай менфят къачудай мумкинвилер тешкилиз куьмекзава. Ада и карда куьмекар гунай РД-дин Халкьдин Собранидин депутат Арсен Пирмегьамедоваз сагърай лагьана. «Лезги газетдин» архив электронный къайдадиз элкъуьрунин кIвалах гьеле давам жезва.

Изображение

Презентациядин сергьятра аваз М. Ибрагьимова редакцияди­ об­ра­зованидин рекьяй кьилиз акъуд­завай проектрикайни ихтилат­на. Абурукай сад – гьар йисуз тешкил­завай международный дережадин «Лезги диктант» мярекат. Малум тирвал, эхиримжи кьве йисуз и чIехи серенжем лезги халкьдин баркаллу руш Фируза Керимовадин «Иман» фондунин куьмекдалди кьиле тухвана. Ам кьве къайдада – офлайн ва онлайн – жуьреда кьиле физва. И карди Дагъус­тандилай къецепата, гьатта маса уьлквейрани яшамиш жезвай ватанэгьлийриз интернетдин куьмекдалди хайи чIалалди диктант кхьидай мумкинвал гузва. Вилик йисара «Лезги диктантда» Азербайжанда, Туьркияда, Белоруссияда, Эстонияда ва маса уьлквейра яшамиш жезвай лезгийрини иштиракна.

Кьилди М. Ибрагьимов лезги чIа­лай тешкилнавай онлайн-кур­са­рал акъвазна. Сифте яз редакция и проектдив 2019-йисуз «Лезги ким» проектдин автор Имран Гьуьсейнован теклифдалди эгечIнай. Эвел кьиляй курсарик экечIиз кIан­завайбурун кьадар 80-дав агакьнавай. Абурун арада неинки са лезги, гьакIни маса миллетрин векиларни авай. Мисал яз, редакцияда онлайн-къайдада тешкилай тарсара лезгидиз гъуьлуьз фенвай татар халкьдин векилрикай тир са руша вичиз лезги чIал чирзавай. Алай вахтунда тарсар Абдурашид Гьамидова тухузва, муаллимдин зегьметдиз акъатзавай харжияр «Лекьрен муг» этнолагердин регьбер Садикь Гьасанова чара ийизва. Къейд ийин хьи, онлайн-курсар гьавая тешкилнава, яни тарсариз къвезвайбурухъ пулсуздаказ хайи чIал чирдай мумкинвал ава.

«Лезги газетдин» кьилин редакторди гьакIни редакцияди хайи чIал хуьн ва вилик тухун патал акъудзавай ктабрикайни ихтилатна. «100 тапшуругъ», «Лезги чIал чирин» ва «Лезги чIаланни урус чIалан шикилар галай гафар­ган». Абур «Хайи чIал чирзава» проект­дин сергьятра аваз меценатрин куьмекдалди чапдай акъуднава­. М. Ибрагьимован гафаралди, и кта­бар иллаки гзаф Дагъустанди­лай къе­цепата яшамиш жезвай­ ватан­эгьлийри маса къачузва.­ ГьикI ла­гьайтIа, Россиядин ре­ги­онра­, Дагъустанда хьиз, хайи чIал чир­завай мектебар авач. Ихьтин шар­тIара диде-бубайриз чпин веледриз лезги чIал чириз четин жезва. И карда лагьайтIа, редакцияди акъуднавай ктабар кьилин куьмекчийриз элкъвезва.

«Лезги газетдин» кьилин редактордин презентациядин гьа­къин­дай вичин фикирар лугьудайла, РД-дин рекъемрин рекьяй вилик финин, информациядин ва печатдин министрдин везифаяр вахтуналди тамамарзавай Юрий Гьамзатова и ктабар, интернетдин майданра маса къачуз регьят жедайвал, «Яндекс Книги», «ЛитРес» ва маса сайтра эцигун теклифна.

Чи  мухбир