Руьгьдинни ахлакьдин тербия
Россиядин халкьарин садвилинди яз малумарнавай 2026-йисаз талукьарнавай жуьреба-жуьре серенжемар кьиле тухун давам жезва. Ахьтинбурук и йикъара Дагъустандин УИС-дин (уголовно-исполнительная система) са жерге идарайра, кьилди къачуртIа, дуьз рекьел хкидай 2-нумрадин колонияда, 8-нумрадин колония-поселенида, 2-нумрадин СИЗО-дин (силисдин изолятор) дустагъра авай ксар патал Россиядин халкьарин руьгьдинни ахлакьдин ерийрин къиметлувилиз, чIехи уьлкведин миллетрин адетриз, халкьарин арада дуствилин алакъаяр мягькемаруниз талукь яз кьиле тухвай тарсарни (лекцияр) акатзава.
Чпин макьсад руьгьдинни ахлакьдин тербия гун хьиз, гьакIни ватанпересвилин къанажагъ, эдебдин дурумлу ориентирар арадал гъиз, дустагъдай экъечIайла, жемиятда къанунрихъ галаз кьурвал яшайиш кьиле тухуз куьмек гузвай и серенжемар «Россиядин халкьар» международный гьафтедин ва хъсан адетрин къиметлувал хуьнин ва мягькемарунин рекьяй гьукуматдин сиясат кьилиз акъудунин сергьятра аваз тешкилнавай. Дустагъра авайбурухъ галаз тарсар кьиле тухун патал идарадин тербиядин, гьакIни диндин рекьерай пешекарар желбнавай.
Серенжемдин нетижаяр кьадайла, УФСИН-дин (ФСИН – Федеральная служба исполнения наказаний) дустагъра авайбурухъ галаз тербиядин ва яшайишдин кIвалах тухудай отделенидин начальник, къенепатан къуллугъдин подполковник Эльдар Ражабова къейд авурвал, Россиядин халкьарин садвилин йисуз чи садвал гьар са карда мадни мягькемди хьана кIанда. Адан гафаралди, дустагъра авайбуруз анай экъечIайла уьмуьр лайихлудаказ давамариз куьмекдай руьгьдинни ахлакьдин бинейрикай хабар гузвай ихьтин мярекатар идалай кьулухъни тешкилдайвал я.
Регина Семедова